SC: 2nd placer dili makapuli-asumir

Nabingat pag-ayo sa kalipay ang nawong ni Rep. Benny Abante dihang milampos siya sa iyang pagpetisiyon kang Luis ‘Joey’ Chua Uy, kinsa maoy midaog pagka-kongresista batok Abante, 6th District, Manila, sa miaging midterm election, nga i-disqualified kini sanglit dili man kuno usa ka natural-born Filipino citizen.

Diin, gideklarar sa Commission on Election (Comelec) nga si Abante maoy lehitimong mananaog ug maoy mopuli-asumir sa nadag-ang puwesto ni Uy.

Namatikdan. Kon kaalyado-attack dog gani sa administrasiyong Marcos ang moreklamo, ang kadali ra gyod makaresponde sa Comelec pabor sa naasoyng kaalyado.

Perog kontra? Ay sus, dugaydugayon! Timaan, nga ang Comelec dili patas sa iyang pangatungdanan.

Sa paghisgot og diskuwalipikasiyon, miagi bayag entrance gate si Uy, kadtong mipayil siyag Certificate of Candidacy (COC), diin human moagig makuting pagsusi nakapasar-na-qualified, nakasulod sa entrance gate ug nakaapil sa panggubatang luna nga giandam alang sa tanang magkombating kandidato, kinsa magpapili para sa gitinguha nilang position.

Busa, ingkaso'g modaog si Uy dili na kini mahimong i-disqualified. Na-qualified na god siya, unya dihang midaog, gi-disqualifed?

Usa ka dakong pagbinastos ang maong desisyon! Nasayop-sipyat ang Comelec? Na’an, nganong si Uy man ang silotan?

Isip kanhi Pit Manager sa casino-Pagcor, nahinumdom hinuon ko, nga kaamgid kini sa usa ka hitabo, diin ang usa ka banned bigtime player, wala dayon madiskitai, nakalusot ug nakadula na sa lamesang baccarat ug diha pa nanawag ang CCTV nga gipa-banned diay kini sa iyang pamilya.

Unsaon, sa halayong casino branch siya tigdulaan ug kadto pang higayona siya nakasulod-dula sa amoa. Unsay among gihimo?

Gipahuman una namo siyag dula, ayha pa nako giduol ug sa diplomasiyang paagi gisultian-pahinumdoman nga wala pa matangtang iyang pagka-banned.

Busa, dili na siya makapadayog dula. Midaog o napilde mag minilyon ang maong guest, iyaha na kadto tanan. Wala gyod kami gibawi! Kay minilyon sab baya iyang puhunang gisugal!

Sama sa nahitabo ni Uy. Sa pagpangampanya migasto sab siyag dakong salapi-oras-kahago. Unya tungod lang sa sipyat sa Comelec, sa tumang kasayon, ang iyang pagdaog bakwion? Pagka-very unfair na man!

Maayo, kay mipagawas og pamahayag ang Supreme Court, diin giklaro nga ang midaog kandidatong na-disqualified, dili pwedeng mapulihan og 2nd placer. Aw, puwerting hugnoa ni Abante!