Miresulta na ang giyera

Karong adlawa, Martes, ang presyo sa krudo ug gasolina nga maoy sagad gigamit sa pagpaandar ug pagpadagan sa mga sakyanan, mosaka og kapin P4.00 matag litro. Grabeng dakoa gyud sa pag-usbaw.

Tungod kini sa giyera sa Iran ug Esrael. Gikuyawan ko nga mosamot gyud kagubot kay miapil na ang United States sa gubat, milaban kini sa Israel, ug gibombahan ang mga nuclear sites sa Iran.

Kabahin sa pagsaka pag-ayo sa presyo sa krudo ug gasolina, makahatag kini og duha ka epekto. Una, dunay posibilidad nga kadtong mga nanag-iya og sakyanan nga dili tantong kwartahan, mopundo na lang sa ilang sakyanan.

Dili na kaayo sila mogamit niini kon dili kaayo kinahanglan. Sa ato pa, makatabang ni nga dili kaayo modaghan ang mga sakyanan nga magdagan sa atong mga karsada ug resulta, mamenosan ang trapik.

Apan ang pagsaka sa presyo sa gasolina ug krudo, apektado ang mga driver sa mga public utility vehicles, ilabi na gyud ang mga taxi driver kay tiaw mo bay P4 ang pag-usbaw sa prisyo kada litro?

Arang-arang ang mga driver sa PUJ kay ang Land Transportation Franchising and Regulatory Board (LTFRB) gipaabot man nga mohatag kanila og pagtugot nga makapa-increase og P1 sa plitehan.

Apan ang mga taxi driver wa sila tugoti nga makapausbaw sa plitehan. Ang mga tag-iya og passenger bus apektado sab kay dili man sila apil nga makapa-increase og plitehan.

Sa ako nang giingon sa miagi natong lindog, nga pait kaayo kay way increase sa sweldo sa mga kawani, apan posible nga mosaka na usab ang mga presyo sa palaliton.

Apan kon sakitan man ang mga dunay trabaho, samot na nga mag-ilaid sa kapait sa panginabuhi ang mga tawo nga way trabaho, nga nanginabuhi lang pinaagi sa pagpamasura.

Gikuyawan ko nga kon mosamot na gyud ang kapait sa panginabuhi, basin og mosaka na usab ang gidaghanon sa mga krimen, sama sa pagpanulis ug pagpangawat.

Unta mag-inabtik ang atong kapolisan aron dili mokuyanap ang mga kaso sa pagpanulis ug pagpangawat.

* * *

Nakabantay ko nga daghan na karong mga polis nga makita nako sa lainlaing dapit, apan mao lagi, nag-standby ra usab sila sa usa ka lugar. Ang nindot gyud mao nga maglakaw-lakaw sila, preventive patrols.

Kon anaa ra sila sa usa ka lugar maglingkod, nagpaabot og dunay alarma, dili kaayo epektibo ang ilang field assignment. Mas nindot gyud kon magpatrolya sila kay aron makita sa mga kriminal nga kuyaw kon mohimo sila’g krimen kay madakpan sila dayon.