Unsay buhaton kun bun-onon sa bana o kapuyo?

Dear Atty. Divine,

Adunay koy kapuyo sud na sa napulo ka tuig ug duna mi duha ka anak. Ang akong problema kay dugay na gyud ko nga nag-antos sa pagpangabuso sa akong partner ilabi na kun siya mahubog. Dili lang physical abuse ang akong mahiaguman kondili lakip na verbal abuse. Makadaghan na gyud mahitabo nga manglagom akong kalawasan tungod sa iyang pagpamun-og. Unsa may angayan nakong buhaton aron mahunong na kining iyang pagpangabuso?  Daghang salamat. — Linda

Dear Linda,

 Ang una nimong buhaton mao ang pagdangop sa inyong barangay og pagpangayo og Barangay Protection Order aron di na siya makaduol nimo. Mas maayo nga magpa blotter sab ka sa police ug magpa medical aron aduna kay proof sa iyang gibubat. Human niini, mamahimo ka nga mopasaka og kasong kalapasan sa Republic Act 9262 kon Anti-Violence against Women and their Children batok sa imong live-in partner  ngadto sa Korte tungod sa physical og psychological violence nga iyang gibuhat batok kanimo. Ang maong kaso usa ka criminal case busa mamahimo siyang mabilanggo kun siya mapamatud--an niini. Thank you and God bless.—Atty. Divine

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.