EDITORYAL - Himsog nga polis

Dili kataw-anan ug dili kayaga-yagaan ang tinguha ni PNP Chief Nicolas Torre III nga kinahanglang walay polis nga dagkong tiyan ug kinahanglang physically fit sila kanunay. Kinahanglan sab silang hanas sa luwas nga paggamit sa ilang mga armas.

Kini tungod kay kun sobra og lima ka kilo ang timbang sa usa ka polis sa kung unsa untay angayan nilang timbang basi sa ilang body mass index o BMI, posibleng mao ni hinungdan nga dili sila ma-promote.

Sa panahon ni kanhi PNP Chief ug karon Senador Panfilo “Ping” Lacson, gipatuman sab niya ang estriktong physical fitness test sa kapolisan, kadtong wala makapasar naapektahan gyud ang ilang karera pagka-polis.

Gikan adto, gihimo nang regular ang physical fitness test (PFT) sa mga polis dili lang isip pagtuman sa regulasyon o kamandoan sa ilang hepe kondili para sab kini sa kaayohan nila ug kaayohan para sa ilang pamilya.

Sa karsada kun dunay emerhensiya ang polis maoy dangpan sa mga tawo, ma-batan-on man o edaran nga polis nga naa diha ug maoy matungnan nga mapangayoan og tabang, gipaabot gyud sa mga tawo nga abtik ug moresponde sila sa labing daling panahon.

Unsaon nalang kun ang polis dili physical fit tungod sa kadako sa tiyan, dunay posibilidad nga sila madisgrasya og ahat atol sa pagresponde, sila na sab hinuoy tabangon sa mga tawo. Mag-unsa sab ang ilang armas kun di sila makamaong mopunting sa mga kriminal?

Sama kang Lacson kaniadto, makita nga si Torre yagpis ang lawas apan abtik. Mataha pud siguro ang mga polis ilabi na kadtong mas batan-on pa kang Torre kung mabiyaan sa dinaganay.

Kay una sa tanan, unsa pa may gamit sa usa ka polis kun dili niya kayang dad-on ang iyang lawas kun makig-ginukdanay sa mga kriminal ug kun dili sila makamaong mogamit sa ilang armas, makasalbar pa kaha sila sa publiko panahon sa emerhensiya?