Mga kinabuhing gilugit gikan sa sabakan sa inahan

Usa ka 75-anyos nga lola kauban ang iyang mga kakunsabo sa abortion operation ang nadakpan sa hiniusang operasyon sa kapolisan sulod sa usa ka inn sa dakbayan sa Sugbo kagahapon sa alas dose sa udtong tutok.

Nakuha ang mga tabletas ug mga kagamitanan sa paglugit sa bata sa mga suspek. Mismo si P/BGen. Redrico Maranan, ang Director sa Police Regional-7, kauban si Col. Enrico Figueroa ang nangunay sa pagsusi sa dapit diin nadakpan ang tulo ka mga suspek.

Nasayran nga ang tiguwang maoy mohimo sa paglaglag sa puya gikan sa sabakan sa inahan nilang kliyente samtang ang usa maoy middleman o ahente ug ang usa ka lalaki mao ang driver sa motor nga ilang gisakyan padung sa motel diin himoon unta nila ang abortion.

Sumala ni General Maranan nga nagsugod ang ilang imbestigasyon sa mga tawong nalambigit sa abortion dihang dunay tulo ka mga puya nga napalgan didto sa lungsod sa Liloan niadtong nakalabayng semana.

Subay niini, mimando siya sa kapolisan nga mohimo og intelligence gathering kon si kinsa ang mga nagpaluyo sa paglaglag sa mga puya gikan sa sabakan sa mga inahan. Ug ilang nakit-an ang usa ka social media page diin nagtanyag sa abortion services. Dinhi nigamit og poseur-client ang kapolisan nga nakig-transaksyon sa mga giingong abortionista hangtud nagkasabot nga sa sulod sa usa ka inn himoon ang paglaglag sa bata ug didto naposasan ang tulo ka mga nalambigit.

Giangkon sa tiguwang nga naghimo siya sa abortion usa ka tuig na ang nakalabay diin miabot na sa 15 ka mga babaye ang iyang nahimong kliyente. Iyang gihimo kuno kay naluoy siya sa mga inahan nga nagkinahanglan sa iyang tabang kay matud niya, dugo pa lang bitaw ang malaglag sa sabakan. Sa kantidad nga singko mil pesos iyang gibaligya ang iyang kalag sa yawa paita. Pero matud sa kapolisan nga 40 mil diay matag kleyente sang ilang pangayo.

Hinuon bahinon pa nila kini sa middleman nga miangkon nga P15,000 ngadto sa P20,000 ang iyang makwarta kong maka-refer siya og kliyente ngadto sa abortionista. Mas dako pa ang iyang masapi itandi sa tiguwang. Ang driver sa motor nga ilang gisakyan nadamay intawon sa krimen sa bayad nga usa ka libo ka pesos isip pakyaw nga plete.

Pareho ang ilang linya nga naluoy sila sa mga inahan nga nagkinahanglan sa serbisyo busa ila nalang kining gitabangan. Apan tabang og duot hinuon nga maayo gyung dauban kining mga tawhana. Wala sila maluoy sa anghel nga ilang gipatay mismo sa sulod sa lawas sa inahan niini. Buhi pa lang pero gisunog na sa kalayo ang ilang kalag.

Kining tulo ka mga dinakpan posibleng sila pud ang utok niining mga napalgang puya sa nagkadaiyang dapit. Kadtong ilang ma-abort basin ipanglabay nalang nila bisan asa. Angayan kining tutokan basin dili lang kining tiguwang ug ang iyang mga kauban ang naghimo sa krimen kon dili naa pay uban nga gihimo nilang panginabuhian.

Ang mga ginikanan o ang inahan nga nagpa-abort ang angayan usab nga bitayon sa ilang gibuhat nga kaugalingon nila dugo ang ilang gipapatay. Asa naman intawon ang ilang kasingkasing kong duna pa man gani. Mao na magtugatuga og pamiga ug kong moresulta na ila na dayong ipakuha. Dakong tulobangon kini sa balaod sa yuta ug sa langit.