Kabalaka ug presyo sa lana

Ang kabalaka makapasaka diay sa presyo sa lana. Dinhi lang ni nahitabo sa Pilipinas.

Matud pa sa Department of Energy nga ang tension tali sa Israel ug Iran nakapabalaka sa mga kompanya sa lana tungod sa posibleng pagtaas sa presyo sa lana sa merkado sa kalibotan human mipasaka og tag $6 ngadto sa $7 sa matag barel sa krudo ug gasolina ang Dubai.

Sa ato pa diay, ispikulasyon lang ang gibasihan sa mga kompanya sa lana sa pagpaumento sa presyo sa ilang produktong petrolyo. Makatarunganon ba kini natong mga konsumedor nga ang umento sa presyo ibasi lang sa ispikulasyon? Mao ni ang akong giingon, dinhi lang kini sa Pilipinas.

Ang Department of Energy na mismo ang miingon nga ang umento nakabasi sa kabalaka sa mga kompanya sa lana sa pagtaas sa presyo niini sa merkado sa kalibotan, nga sa atong pagsabot nakabasi lamang kini sa ispikulasyon. Pero nganong ila mang gitugotan ang pag-umento sa presyo sa mga produktong petrolyo? Klaro ug tataw, nakigkomboya sa mga kompanya sa lana ang atong gobyerno sa paglatigo natong mga konsumedor aron atong matagamtaman ang tumang kasakit.

Kun mipasaka sa presyo sa ilang produktong petrolyo ang Dubai, dili kini ikasakit sa mga kompanya sa lana sa Pilipinas kay wala man kita, magpalit og lana sa Dubai. Sa ako nang nasulat niadtong Martes, ang Pilipinas nag angkat lang og lana sa Saudi Arabia (50%), United Arab Emerits (31%) ug ang nahabiling porsiyento gibahin sa Australia, Taiwan ug South Korea.

Ang umento sa presyo sa mga, produktong petrolyo nga nakabasi lang sa ispikulasyon dakong tinonto. Sa ka dako ning maong tinonto walay bisan usa diha sa mga kongresista ang nagpakabana niining maong tinonto? Asa naman si Kongresista Brusas, Senador Risa Hontiveros, Koko Pimentel ug uban pa? Asa naman tong taga Quad Committee? Dili mo mag-House ug Senate inquiry ini’g abli sa 20th Congress niining dakong tinonto?