Kaabag, dili kaaway ang media

Angayang pahinumduman ang mga opisyal ug kawani sa nagkadaiyang ahensiya sa gobiyerno nga dili ninyo kontra ang mga sakop sa media. Hinunoa, inyo silang kaabag sa paghatod sa serbisyo ngadto sa publiko pinaagi sa pagpahibawo sa katawhan sa mga programa sa inyong ahensiya.

Kun may mga higayon man nga dili mohaom sa inyong gusto o ba kaha negatibo ang kasayuran nga mogawas batok ninyo ug sa inyong ahensiya, wala ni magpasabot nga dunay nagpahipi nga dautang motibo ang media sa pagpahibawo niini ngadto sa katawhan.

Kabahin ni sa tahas sa media pagsiguro nga ang mga opisyal ug kawani sa gobiyerno kanunay’ng responsable ug manubag sa tanang butang nga ilang buhaton. Kun pananglit dunay sayop sa mga kasayuran, wala kinahanglana ang pagpanghulga dayon sa media ug paghimong hinagiban sa cyber libel aron hasi-on ang reporter.

Ang mga opisyal ug kawani sa gobyerno angayang magbaton og igong pasensiya taliwa sa mga pagsaway nga may labot sa ilang opisyal nga katungdanan. Sa laktod, dili angayang “onion-skin” ang mga opisyal sa gobyerno.

Sama pananglit sa nahitabo sa bag-ong reporter sa The Freeman nga si Nicholas Malaga niadtong Lunes, atol sa unang adlaw sa pagbukas og balik sa klase sa mga publikong tunghaan. Samtang gisuhid ang Cebu City Central School, gidapit ang iyang pagtagad sa mga ginikanan, magtutudlo ug bisan sa security guard sa tunghaan tungod sa naghuot nga mga motorsiklo nga nagpatuyang og parking gawas sa gate sa eskwelahan.

Nanghinaot ang mga ginikanan nga dunay polis nga makabadlong sa nagpatuyang og parada sa ilang motorsiklo. Gamit ang iyang smart phone, gikuhaan ni Malaga og hulagway ang sitwasyon sa tunghaan diin nagpakita nga way polis sa maong dapit.

Dihang migawas sa social media ang report, labihang sukoa sa mga opisyal sa Cebu City Police Office (CCPO) og namasangil nga “fake news” ang migawas sa social media page sa The Freeman ug mibahad nga mopasaka og kaso batok sa reporter.

Inay susihon unsa ka tinuod ang taho ug imbistigahon ang mga nadistino sa maong tunghaan, daling nanghulga ang CCPO nga mosang-at og kaso ug mihulagway sa report nga fake news. Dili ni maoy hustong taras sa mga tinuod nga public servants. Way malisya ang reporter sa iyang pagtaho unsay sitwasyon sa maong tunghaan niadtong tungora nga didto siya. Posibling ang mga polis nga gidistino sa CCPO nga magbantay sa maong tunghaan maoy naglakwatsa ug mibiya sa ilang pwesto hinungdan nga wala sila igkita sa reporter ug sa mga ginikanan.

Ug dili sala sa reporter kun naglakwatsa ang mga polis nga gidistino sa CCPO. Busa ang angayang gibuhat sa kadagkoan sa CCPO mao ang pagsusi inay nga manghulga sa reporter.  Daghang salamat diay sa Commission on Human Rights (CHR) sa inyong pagpakabana.