EDITORYAL - Kapayason

Kapayason.  Mao ni ang tawag sa mga tawong modiretso og tibi kun dili kauyon sa mga nahitabo sa ilang palibot o ba kaha kun sila maoy natungnan ug wala sila makauyon.  Sa Eninglis pa, onion-skinned.

Imbes nga kurihian ang nakitang depekto aron matarong, mangaway naman hinuon. Hain man ang kaayohang makuha gikan ani nga klase sa reaksyon? Makadaghang higayon na nato madungog ang atong mga opisyales sa gobiyerno sa bisan asang mga ahensiya niini nga moingon: “Public service is a public trust.”

Ilaha kining gikutlo sa mismong Batakang Balaod sa nasud nga mao ang 1987 Constitution diin nalatid sa Article XI nga giulohan og Accountability Of Public Officers sa Section 1. “Public office is a public trust. Public officers and employees must, at all times, be accountable to the people, serve them with utmost responsibility, integrity, loyalty, and efficiency; act with patriotism and justice, and lead modest lives.”

Kun hubaron ang kahulogan niini, ang mga nagtrabaho sa gobiyerno gisaligan sa katawhan og gahum ug responsibilidad ug kini gamiton lamang para sa kaayohan sa publiko ug dili sa personal nga interes o kasikatan.

Nagtangag sa public service ang kaakohan ug integridad kay mao kini ang kanunay gipangita sa katawhan gikan sa tanang empleyado o kawani sa gobiyerno bisan unsa pang posisyon.

Kun ugaling dunay makitang kasaypanan o kakulangon silang nahimo nga kinahanglang kurihian, dili sila angay masuko ug mamahad o mobawos. Mas maayong susihon ang kamatuoran alang sa kaangayan sa tanan ug aron mahatud ang serbisyong gipaabot sa publiko.

Ang nakapahiubos ani, dunay mga naa sa gobiyerno nga nagtuong pirme silang sakto, perpekto ang ilang mga gibuhat ug wala na nila makita nga dili tanan sa ilang panon ang pareho nila og tinguha.

Kung ang usa ka tawo dili na modawat og kasaypanan, wala na kini paglaum para molambo pa.