Lipat-lipat sa mga kompanya sa lana

Misaka ang presyo sa mga produktong petrolyo karong adlawa. Ang mga kompanya sa lana mipausbaw sa presyo sa ilang gasolina ug krudo sa P1.70 ngadto sa P1.90 matag litro ug tag P1.40 ngadto sa P1.60 sa matag litro sa ilang kerosene.

Ang rason sa umento mao ang tension tali sa Israel ug Iran nga nagtinirahay og missiles.

Basi sa talaan sa gobiyerno ang Pilipinas nag angkat og lana sa Middle East o tunga-tungang sidlakan diin katunga sa atong giangkat nga lana nagagikan sa Saudi Arabia samtang ang nahabilin nga 31% gikan sa United Arab Emirates.

Buot ipasabot, ang Saudi Arabia mao ang atong nag unang supplier og lana ug gisundan kini sa UAE.

Gawas sa Saudi Arabia ug UAE, miangkat usab kita og lana sa Kuwait ug Iraq, Australia, Taiwan ug South Korea.

Niining maong datus, wala gihisgotan ang Iran, Russia ug Ukraine nga nag angkat ang Pilipinas og lana ning mga nasura pero kanunay nga gihimong rason sa mga kompanya sa lana sa pagpaumento sa prisyo sa ilang mga produktong petrolyo.

Karon, ang gubat napod sa Israel ug Iran ang ilang gihimong rason sa dakong umento sa presyo sa ilang produktong petrolyo. Gilipat-lipat ta sa mga kompanya sa lana. Ang nakadakong dimalas kay hasta ang gobiyerno sa Pilipinas kanunay nga mihatag og pagtugot sa pagpanglipat sa mga kompanya sa lana ngadto sa ilang mga konsumidor. Sa laktod, ang gobiyerno nakigkonsabo sa mga kompanya sa lana ina kay mao unta kini ang manalipod sa mga konsumidor.

Kun tinuod pa nga ang gubat sa mga nasud nga wala ta mag-angkat og lana ang rason sa pag umento sa presyo sa mga priduktong petrolyo, nganong sa panagsa mopaubos man sila sa prisyo sa ilang produktong petrolyo nga wala pa man unta mahunong ang gubat sa Russia ug Ukraine?

Dili ikalimod nga makaapekto sa ekonomiya sa kalibotan ang bisan unsa man nga tension nga makatandog niini pero adto lang segurong mga kalihokan sa ekonomiya nga adunay direkta nga involvement ang usa ka nasud. Dili pariha aning gubat karon sa Israel ug Iran nga gihimong rason sa pag umento sa prisyo sa produktong petrolyo nga wala man unta ta mag angkat nila og lana. Wala lang seguro nako masabti og maayo ang akong economic subject kaniadto sa akong pagtuon. Pasayloa lang ko, dili g'yud ko makakonektar sa umento sa presyo sa petrolyo ug sa gubat sa Israel ug Iran.