Pagsulti og Hinapon

Sa hinapos nga bahin sa termino ni kanhi Cebu City Mayor Tomas Osmeña kaniadto, duna siya’y nindot kaayong programa nga way gasto sa siyudad, apan nakatabang kini’g dako ngadto sa mga gusto nga manarbaho sa Japan.

Nagpasiugda si Tommy kaniadto og Japanese Language course ug swerte ko kay usa ako sa nakatoon pagsulti ug pagsuwat sa pinulongang Hinapon.

Boluntaryo ra ang serbisyo sa among sensei kaniadto, apan kon himoon kini pag-usab karon sa administrasyon ni Mayor Nestor Archival ug Vice Mayor Osmeña, pwede ra gyud niya kini nga mahimo.

Kada Sabado ra ug Domingo ang among klase, duha ra sab ka oras. Ang among sensei nagpadayag og kaandam nga moserbisyo gihapon siya aron nga makatabang sa mga gustong moadto sa Japan.

Dagko og sweldo kon manarbaho ka sa Japan apan dili sayon kay kinahanglan ka pa nga motuon sa pagsulti og Japanese language aron nga magkasinabtanay mo ug ang imong agawon didto.

Sa ubang nasud, wa man kaayoy problema kay makasabot man ta’g eningles, bahala na og dili kaayo ta maayo mosulti, apan makasabot. Apan ang Hinapon, pwerteng lisura gyud.

Maayo unta og mahunahunaan kini nilang Mayor Archival ug Vice Mayor Tommy aron makatabang ang siyudad niadtong gusto nga manarbaho sa Japan nga dili na makagasto’g dako.

* * *

Dunay nagpadayon karon nga road concreting project diha sa Veterans Drive dapit sa Sitio Maracas, Lahug ug gihimo kini sa Department of Public Works and Highways (DPWH) pinaagi sa private contractor.

Isugyot unta nako nga ang KIMWA Construction modestino gyud og mga “flagman” nga magsilbing traffic officers aron dili mag-ilogay ang mga motorsista paglusot ug makalangan na hinoon sa biyahe.

Adto pa lang sa ibabaw dapit sa Marco Polo Hotel, butangan na og pahibawo nga sa unahan dunay ongoing road repair ug kinahanglang one lane na lang ang mga sakyanan.

Wa ko makakita og mga flagman nga gilatid man gyud unta na sa kondisyon sa Technical Infrastructure Committee ug bisan sa Traffic Board.

Karon, duha ka lane ang gigamit unya, inig-abot sa duol na sa project, mag-ilogay na pagsulod sa linya kay one lane na man lang. Anha diha nga magka-traffic na.

Ikaduha, kon mahuman na unta ang maong pagsemento sa karsada, estriktohon gyud nga dili na himoong parking area sa mga sakyanan ang daplin sa karsada.

Ilabi na kining mga magluto og pan, nga migamit og tricycle, anha gyud magparking sa daplin. Maisip ra kini nga nagbutang sila’g tindahan kay anaa man kini kada adlaw ug gabii na mopahawa.

Usa niini anaa dapit sa Barangay Hall sa Busay. Unta mabadlong na kini.