Mamatay kay gipasagdan

Segun sa tambayayong nga pagtuon sa Ateneo de Manila University School of Medicine ug sa University of the Philippines Manila, ang mga migraduwar sa kurso nga medisina nakabatyag og pagkasaag ug kakulang sa suporta sa dihang mitrabaho na sila sa gobiyerno. Mao ba kaha kini hinungdan ngano nga dili compassionate ang pagpangalad sa mga empleyado sa mga hospital ug health centers sa gobiyerno?  Matud pa sa uban, “Ang kakulang sa pagpakabana maoy kamatyan sa mga pasyente. Sama sa linya sa awit nga ‘Mona Lisa’, inig abot nimo sa hospital, You just lie there, and you die there.”  Fezteleern!

 Termino lang ang mitaas

Gi-ratipikahan na sa Kongreso ug sa senado ang bicameral conference committee report nga nagtakda sa termino sa mga barangay ug SK officials ngadto sa upat na ka tuig gikan sa kasamtangan’g tulo ka tuig nga limit.  Kon mahingpit na ang maong balaod, matakda na ang sunod nga BSKE karong unang lunes sa Nobyembre 2026 ug dili na karong Disyembre ni’ng tuiga.  Kwestiyonable ang katuyoan sa pagsige og uswag sa eleksyon sa barangay ug SK officials labi na kay dili ang COMELEC maoy miduso ug mipasiugda niini.  Bagulbol pa sa akong silingan, “Nitaas ang termino sa kapitan ug sa SK apan wala gyud motaas ang matang sa ilang panerbisyo.”  Fishkots!

Kada hikap, hero!

Namahayag si Bise Presidente Sara Duterte nga dili siya ang modala pauli sa iyang amahan nga si kanhi Presidente Rodrigo Duterte kon dili ang iya na’ng kaalyado nga si Senador Imee Marcos. Maisog og puno sa kalantip kining “hagit” nga gipadangat sa bise presidente ngadto sa senador.  Kon mabuhat kini ni Senador Imee, piho nga mamahimo siyan’g bayani sa mga DDS.  Makapahinumdum kini sa linya sa awit ni Diana Ross nga nagkanayon, ‘Everytime you touch me, I become a hero’ nga sa binisaya pa kuno, nagpasabot nga “Kada hikap, hero!”  Madahaan!

 Gun-obon una buangon

Gihukman sa Office of the Ombudsman nga guilty sa indirect contempt si outgoing Cebu Governor Gwendolyn Garcia tungod sa wala pagpanumbaling niini sa preventive suspension order nga giluwatan sa Ombudsman batok kaniya niadtong Abri 2025.  Sa panglantaw sa kadaghanan, kining pagmagahi sa gobernador ug uban pa niya’ng kwestiyonable’ng desisyon mipakita nga wala siya makadawat sa iyang kapildehan busa wala na magkadimao ang iyang reaksyon sa mga panghitabo.  Mora’g haum niini ang panultihon nga “Kinsa kadtong buot gun-obon sa Diyos, iya unang bu-angon.”  Muleeng!

 Pa-apilan og sardinas

Nagsugod na ang Department of Agriculture ug ang Department of Labor and Employment pagpamaligya og bugas nga tag P20 matag kilo ngadto sa mga nagdawat lang og minimum nga suholan.  Maayo unta kon giapil sa kagamhanan pagpabarato ang mga de lata ug instant noodles kay mao ra ba kini ang sagad madali-dali nga sud-an sa katawhan.  Makapahinumdum sa bata nga sa pagkadungog niya nga nag-ampo ang iyang inahan nga mahatagan unta sila’g bugas nga malung-ag, mihunghong sa iyang inahan nga, “Nay, apili pangayo’g sardinas ug Lucky Me.”  Pagkatoytoy!