EDITORYAL - Impeachment sa 20th Congress?

Kun ang Senado sa 19th Congress napakyas sa paghusay isip impeachment court sa kaso ni Bise Presidente Sara Duterte tungod kay kuwang na sa oras ug panahon, walay makatarunganong rason aron dili kini ipadayon sa sunod nga 20th Congress.

Ang pag-convene sa Senado isip impeachment court sayo ning semanaha nga napunta lang sa wala gumikan sa mga teknikalidad ug kakulang na sa panahon, pamaagi nalang kadto aron dili sila lat-an og pagsaway sa katawhan nga gustong madungog ang paghusay.

Walay laing haom nga venue para husayon ang mga pasangil kang VP Duterte kondili sa impeachment court sa Senado ra gyud kay mao ni ang naa sa Batakang Balaod.

Wala lang sa hustong panahon tungod kay nasugdan ang tanan panahon sa election period nga diin busy kaayo ang tanan, ilabi na kadtong mapupos ang termino ning tuiga, nagkadungan-dungan tanan nga gustong palabyon lang una ang eleksyon.

Kay gawas nga dili kaayo mahatagan og panahon ang pagtuki niini, duna say uban nga nagduhaduha kay kuwang sila sa gidaghanon kun magbotohay na unya sa pagpagawas sa hukom batok ni VP Duterte kinsa adunay mga batos nga mga senador.

Nabuhat sa 19th Congress ang ilang mandato nga mobarug isip impeachment court, apan hilaw lang kay wala man gyud maabot sa punto nga naghusay ug nahukman ang articles of impeachment. Sa laing bahin ana, wala sab madungog ang depensa ni VP Duterte sa mga pasangil kaniya.

Sa samang higayon, wala sab matubag ang mga tanghaga aning mga alegasyon batok sa bise presidente. Gi-remand o gibalik ang articles of impeachment sa Ubos Balay Balauranan apan maayo gihapon kini kay pwede pang mausab ang nahaunang giduso.

Pero di pa ni uwahi ang tanan, kay duna nay bag-ong hut-ong sa mga magbabalaod karong 20th Congress. Pwede nila kining usbon og balik. Tingali wala nay rason para dili kini husayon aron mahuman na ang tanan.