Gibaboy ang proseso

Dili pa igo nga ilang gilangay pag-atiman ang articles of impeachment batok ni Bise Presidente Sara Duterte, gidugangan pa gyud sa mayoriya sa mga senador ang ilang pagkataspukan sa trabaho pinaagi sa pag-uli niini ngadto sa House of Representatives nga di lang makalangay og samot kun di posibli pang mahulog nalang sa hingpit nga kalimot sanglit motapos naman ang 19th Congress sa Hunyo 30.

Pinaagi sa 18-5 nga boto nahukman sa Senado, nga karon nahimo na nga impeachment court, niadtong Martes sa gabii ang pag-uli sa articles of impeachment didto sa House of Representatives tungod sa duha ka mga rason. Una, buot sa mga senador nga i-certify sa House nga wala sila makalapas sa one-year ban ug ikaduha, buot nilang klarohon sa mga kongresista nga maglangkob sa 20th Congress kun interesado pa ba silang padayonon ang kaso.

Ang gihimo sa 18 ka mga senador tataw nga pagtalikod sa ilang obligasyon ubos sa Constitution nga husayon gilayon ang impeachment case nga moabot sa Senado. Bisan ang dili abogado makasabot sa argumento nilang Senate minority leader Koko Pimentel ug Risa Hontiveros nga wala kinahanglana nga ilang iuli ang reklamo didto sa kongreso.

Kini tungod kay mahimo nilang pangutan-on atol sa pagsugod na sa trial ang mga kongresista nga magsilbing prosecutors kun wala ba malapas ang one-year ban ug kun interesado pa ba ang umaabot nga kongreso pagpadayon sa reklamo. Gawas pa isip mga senator-judges dili husto nga mogawas nga silay nangabogar sa bise presidente. Kun dunay kwestiyon sa legalidad sa articles of impeachment angayang gitugyan sa mga senador ngadto sa mga abogado sa bise presidente ang pagkwestiyon niini.

Ang nahitabo, gibaboy sa mayoriya sa mga senador ang impeachment process pinaagi sa pagpakita sa ilang pagdapig sa bise presidente bisan wala pamakadungog sa mga argumento ug ebidensiya sa prosecution.

Asa man ka makakita og huwis nga maoy mangusog nga ibasura ang kaso bisan wala pa makasugod ang husay? Si Senador Bato dela Rosa ray nakahimo niini!

Alang nako makiangayon alang sa bise presidente nga mapadayon ang husay aron iyang kapamatud-an pinaagi sa legal nga proseso sa impeachment nga siya inosente sa mga pasangil batok niya. Ug sigurado ko nga andam ang bise presidente ug ang iyang mga abogado nga pamatud-an ang ilang pangangkon nga inosente siya sa tanang pasangil batok niya ug nga ang tanang kaso pulos tumo-tumo aron pagpi-ang sa iyang karera sa politika labi pa sa nagsing-abot nga presidential election sa tuig 2028.

Ang pag-atubang lang sa impeachment trial maoy paagi aron mahunong ang tanang mga pagduda sa pangurakot batok sa bise presidente.