Ulug-ulog ray tuohan
Maminaw lang si outgoing Governor Gwen Garcia sa pahinumdom sa iyang manghod nga si Winston Garcia sa pagdawat dayon sa ilang amahan nga si Pabling Garcia sa iyang kapildehan sa reelection niadtong 2013 kon dili na mosidlak ang adlaw sa silangan.
Kay si Gwen nakapasaka na og election protest, nakagasto na og minilyon ka pesos pagkuwestiyon sa resulta sa eleksiyon, nahinayak na sa pag-insister nga maoy tinuod nga nidaog sa niaging eleksiyon. Gawas pa, wala mabantog si Gwen nga matinahuron sa sukwahi nga sulti sa ilang amahan sa buhi pa.
* * *
Si Gwen nga maoy kamaguwangan wala sab maila nga maminaw sa iyang mga igsuon. O sa ilang mga paryente. O ni bisan kinsa. Mao tingaling napugos na sila sa pagpahibawo sa publiko sa ilang pagsupak sa iyang paugat:
Si Kongresista Pablo John Garcia niawhag niyan sa pagtahud sa suspension order sa Ombudsman;
Si Tourism Secretary Christina Frasco niangkon na nga ang resulta sa eleksiyon dili mao ang ilang gilaoman; ug
Si Winston, sa wala pa mopasidungog sa kaligdong sa ilang amahan, nipahalipay nang Governor-elect Pam Baricuatro sa iyang kadaogan.
* * *
Dili na nila masulti sa publiko, pero ang Pamilyang Garcia nahadlok. Nga ang pagdumili ni Gwen sa pagtahud sa hukom sa mga botante niadtong Mayo 12, kanus-a gilubong siya og taga liog, dili lang makapalisod sa iyang pagbalik sa Kapitolyo sa 2028.
Kon dili, ug labing importante, mopasamot sa kasuko sa mga Sugboanon ug makadaot sa kahigayonan sa ubang mga sakop sa ilang dinastiya sa pagpapili sa bisan unsang puwesto sa gobyerno sa umaabot nga mga eleksiyon.
* * *
Duna nay nitulisok sa kamananakod sa kalang-og ni Gwen. Mga dumadapig ni outgoing Cebu City Mayor Raymond Garcia nibasol ni Gwen nga maoy nakaduhig nila. Mga lider ni kanhi Mandaue City Mayor Jonas Cortes kumbinsido nga si Gwen ang nakabira nila.
Hangtod sa niaging semana, sa iyang mga diskurso sa Kapitolyo, wala kurhii ni Gwen ang ulug-ulog nga siyay numero unong gobernador sa Pilipinas. Pinasikad sa surveys nga klarong peke kay unsaon man pag-ranggo kinsay una ug iwit sa mga gobernador? Maong walay bilib sa eleksiyon kay nahalin sa samang surveys nga nipasalig og 98% sa mga boto.
* * *
- Latest
