Traydor sa 'Independence'

Sa pagsaulog sa Adlaw sa Kagawasan karong Hunyo 12, atong gisaulog ang kagawasan nga gilamdagan sa dugo sa atong mga bayani.

Apan sa atong kasaysayan, klaro nga ang kagawasan kanunay'ng gisamok sa pagluib gikan sa sulod.

Si Emilio Aguinaldo, nga giila nga lider sa rebolusyon, giakusahan sa pagpapatay kang Andres Bonifacio ug sa ulahi misalig sa Estados Unidos human siya masikop.

Karong panahona, sama nga istorya ang nagpadayon. Ang kanhing presidente Rodrigo Duterte giatubang sa imbestigasyon sa International Criminal Court (ICC) tungod sa iyang gubat batok sa druga. Bisan daghang kontrobersiya ang naglibot niini, usa lang ang klaro: ang atong soberanya nasulayan.

Ngano nga ang langyaw nga korte pa ang mopamugos og hustisya?

Kon tinuod kitang gawasnon, dapat ang atong hustisya ang mopadagan sa proseso, dili sa uban.

Mas grabe pa, ang kalit nga kalayo tali ni Presidente Ferdinand Marcos Jr. ug sa kampo ni Duterte nagpakita sa usa ka bagong klase sa pagtraydor.

Ang kahilom ni Marcos Jr. sa isyu sa ICC, ug ang suporta sa umaabot nga impeachment kang Bise Presidente Sara Duterte, nagpadayag sa political nga panagbulag.

Usa kini ka pagpamugos sa gahum bisan pa kon ang presyo niini mao ang pagkabungkag sa nasodnong panaghiusa.

Kini dili lang politika, kasaysayan kini nga nagbalikbalik.

Sama sa gibuhat ni Aguinaldo sa iyang mga kauban, ang karon nga mga lider sab walay kaluoy sa ilang mga kaalyado basta lang molungtad sa gahum.

Samtang nagasaulog kita sa Adlaw sa Kagawasan, kinahanglan nato pangutan-on ang atong kaugalingon: tinuod ba kitang gawasnon o nagsige lang ta’g balik-balik sa atong mga sayop?

Ang paghandom sa kagawasan dili lang bandila ug parada. Kini panaghiusa, baruganan, ug pagkamatinud-anon sa nasod.

Apan kung ang mga lider magpabiling tigtalikod sa ilang katawhan, magpabilin lang gihapon kita sa anino sa kasaysayan, nga hangtod karon, gipadagan gihapon sa Traydor sa ‘Independence’.