EDITORYAL — GE subjects usik-usik sa panahon

Karong buwana nagsugod na ang enrollment sa nagkadaiyang colleges, publiko man o pribado. Laing galastuhan na sab kini para sa mga ginikanan kansang sweldo dili na paigo para sa panginahanglan kada adlaw.

Apan walay mahimo tungod kay kinahanglan man kini para sa kaugmaon sa ilang mga anak. Bayad sa walay kusmod sa tuition ug miscellaneous.

Ning bag-o, nilanog ang mga panawagan ngadto sa Commission on Higher Education (CHED) nga ipatangtang kining mga general education subjects diha sa kolehiyo ug ibalhin kining tanan ngadto sa high school.

Si House committee on government reorganization chair ug Bukidnon 2nd district Rep. Jonathan Keith Flores miingon nga mas maayong ibalhin kini sa high school.

Pagkatinuod, kaning GE subjects nga sagad gitawag og minor subjects nga dunay tag duha ngadto sa tulo ka units, dili gyud gamit sa panarbaho ug dili makasuporta sa kursong gikuha sa tinun-an.

Nagpuno-puno lang kini sa bayranan sa tuition sa mga estudyante, nagpuno-puno sa eskedyul nga kinahanglang tun-an aron makapasar ug makagradwar.

Nganong dili nalang ipokus ang upat ka tuig nga kolehiyo sa kursong gikuha sa estudyante. Sama pananglit anang subject nga Humanities, English Literature, Languages, ug Philosophy ug uban pa, nga walay kalabotan sa mga engineering courses.

Gikan sa first year hangtud sa third year naay mga GE subjects unya pre-requisite pa gyud aron makompleto pero walay gamit sa specialization nga gikuha sa estudyante.

Mas maayo pang ibutang kini sa high school ug senior high school, mas mo-improve pa tingali ang mga bata ini og tungtong sa kolehiyo.

Unya mas makapokus ang mga naa sa kolehiyo sa ilang gikuhang kurso kay usahay kining GE subjects pay hinungdan nga dunay mga estudyanteng dili makapaso kay dunay mga kuwang o wala makapasar sa minor subjects.

Maayo pang itagana kining mga orasa sa internship aron nga mas mapun-an pa ilang kahibalo sa kursong gikuha.