Laing itoy ni Gwen
Human sa pila ka adlaw nga pagpakahilom, gipasabot ni Kongresista Duke Frasco ang iyang pagdumili pagpirma sa manifesto sa padayong pagsuporta sa liderato ni House Speaker Martin Romualdez hangtod sa 20th Congress. Ang mga nagpaabot og katin-awan sa iyang baruganan nahugno. Kay hanap pa sa diyes panas ang iyang baruganan.
Niingon si Frasco nga nakahunahuna siya, human mokonsulta sa iyang kaubanang kongresista ug mga lider sa politika sa ikalimang distrito, nga nagkinahanglan ang House og liderato nga mo-hiusa dili mo-buakbuak. Sa walay paghisgot og bisan unsang detalye unsay atraso ni Romualdez.
* * *
Wala nganli ni Frasco ang mga kongresista sa Kabisay-an ug Mindanao nga susama og baruganan niya. Kon tinuod nga nangonsulta, ang iyang gikasulti mahimong kabahin sa 32 ka kongresista nga wala sab mopirma sa manifesto. Dili mapatigbabaw ang ilang sentimento. Kay 10% ra sila sa 317 ka mga kongresista nga napili sa niaging eleksiyon.
Ang ilang ka-walay salig ni Romualdez wala dasoni sa makabungog nga mayoriya sa mga kongresista nga nipirma sa manifesto: Sa kataposang ihap, niabot na og 285, o 90% sa mga sakop sa House.
* * *
Bisan wala pa ipakita sa publiko ang lista sa mga nipirma sa manifesto, duna nay mga timaan nga padayong nagsuporta ni Romualdez ang ubang mga kongresista sa Sugbo, kasagaran mga sakop sa One Cebu, ang partido nga gipangulohan ni outgoing Governor Gwen Garcia.
Pipila sa mga nakigtagbo ug ni-amen na ni Romualdez mao silang Rhea Gullas, Edcel Galeos, Lolypop Ouano, Ahong Chan, Edu Rama, Raymond Mendoza ug Happy Calatrava.
* * *
Wala isulti ni Frasco ang posibleng tinuod nga rason: Nga gipugos siya ni Garcia, ug ang mga nasuhito sa ilang relasyon nahibawo nga dili siyang kabalibad ug magkurog ganing mosunod sa bisan unsang sugo sa iyang ugangan, kay si Romualdez ang kataposang gipasanginlan nga responsable sa iyang pagka-suspenso niadtong Abril ug pagka-pilde niadtong Mayo.
Unang gitulisok nga nagpa-suspenso niya ang mga Duterte. Dayon si Sandiganbayan Presiding Justice Geraldine Faith Econg. Sa wala pa mahunahunai si Romualdez, unang gibasol ni Garcia nga nakapilde niya mao ang automated counting machines. Ambot kinsa na sab ang sunod nga pahimungtan, samtang desperada nga nangita og kasukmatan gawas sa iyang kaugalingon.
* * *
- Latest
