Kalipay o kaguol

Giaprobahan sa mga sakop sa ubos Balay Balauranan ang P200 nga umento sa suholan sa mga anak sa singot. Una nang giaprobahan sa Senado ang P100 nga umento sa suholan.

Tungod kay wala magkapariha ang umento sa duholan nga gipalabang sa mga magbabalaud usa ka senador ang misugyot nga sagopon na lamang sa Senado ang version  sa ubos Balay Balauranan aron diii na kini moagi sa Bicameral Committee ug mapirmahan dayon sa Presidente aron mahimong balaud.

Apan wala mouyon niini si Senador Joel Villanueva, ang chairman sa Committee on Labor, sa pagtuo nga dili kini pirmahan tungod sa kadako sa umento ug ang resulta wala na hinuon umento sa suholan sa mga anak sa singot.

Ang P200 nga umento nakapabalaka sa mga magpapatigayon tungod sa posibilidad nga mao unya kini ang hinungdan sa ilang pagpanangtang og empleyado o sa pagpanira sa ilang negosyo.

Sigun sa talaan sa Department of Trade and Industry (DTI) ug Philippine Statistics Authority (PSA), ang Pilipinas adunay 1,246,373 ka mga business establishment ug ning maong gidaghanon 1,241,733 o 99.63% niini ang micro, small ug medium enterprises. Anaa lamang niini sa 4,640 o 0.37% ang dagko nga enterprises.

Kun atong tagsa-tagsaon, anaa sa 1,127,058 o 90.43% ang micro enterprises, 109,912 o 8.82% ang small enterprise ug 4,963 o 0.38% ang medium enterprise.

Sa tuig 2023, ang MSME nagpatrabaho og 6,351,466 ka mga trabahador o 66.97% sa kinatibuk-an nga mga trabahador lukop nasud.

Ning maong gidaghanon, 2,156,322 o 33.95% nagtrabaho sa micro, 1,667,894 o 26.26% nagtrabaho sa small ug 429,994 o 6.77% ang mga nagtabaho sa medium enterprises.

Mao kini ang hinungdan nga ang MSME gikonsiderar nga mahinungdanon kaayo sa ekonomiya sa nasud tungod kay naghatag kini og trabaho ug kalamboan sa ekonomiya. Unsa man unyay mahitabo sa mga trabaho ug ekonomiya kun manaktak ug manira sila sa ilang negosyo tungod sa kadako sa umento sa suweldo? Makalipay ba ang umento o makaguol?