Siak sa alyansa

Dugay na nga mikatap ang hungihong may labot sa dakong papel ni Speaker Martin Romualdez sa gidangatan ni outgoing Cebu Governor Gwendolyn Garcia.

Dili sulagma ang takwahaw nga paglusot sa preventive suspension batok ni Garcia pila ka semana sa wala pa ang May 12 nga eleksiyon.

Ang sibaw nga mga estorya mao ang paggamit sa impluwensiya ni Romualdez aron piangan ang gobernador.

Sigun sa mga tinubdan, nagkumbuya si Romualdez ug ang mga negosyante sa Sugbo nga naligsan sa mga polisiya ni Garcia labi pa ang nalambigit sa negosyo sa quarry.

Ang mga negosyante nasuko tungod kay apektado ang ilang negosyo samtang si Romualdez wala sab makaangay nga gikural ni Garcia ang iyang mga kaalyado aron pugson pagpaluyo sa Ako Bisaya Partylist diin ang iyang kamanghurang anak maoy second nominee.

Giingong nasuko si Romualdez nga wa suportahi ang Tingog Partylist sa iyang asawa. Kini maoy hinungdan nga nahimugso matud pa ang plano nga ang iyang asawa nga si Tingog Partylist Rep. Yedda Romualdez molansar pagkagobernador sa Sugbo.

Apan apiki sila sa panahon sa miaging eleksiyon tungod kay dili rehistrado sa Sugbo si Yedda. Ang plano, sigun sa akong tinubdan, posibling sa sunod eleksiyon karong 2028 mokandidato pagkagobernador sa Sugbo si Yedda.

Gani sigun sa akong tinubdan, usa ka semana human sa eleksiyon gitigom nilang Romualdez didto sa ilang pinuy-anan sa Maria Luisa ang tanang mga kaalyado sa administrasyon apan gikatahong wala imbitaha ang mga Garcia, lakip na ni Deputy Speaker Duke Frasco.

Ang wala pagpirma ni Frasco sa manifesto nga nagtuboy ni Romualdez aron sublian pagka speaker nagkumpirmar sa mikatap nga hungihong.

Mas nilig-on ang sukaranan nga tinuod ang mga tabi-tabi dihang si Yedda mismo mipagawas og pamahayag diha sa social media.

Kusganon hinuon nga gipanghimakak ni Yedda nga duna siyay plano nga mokandidato pagkagobernador sa Sugbo.

Matud niya nga dili siya rehistrado ug botante sa Sugbo ug busa dili tinuod nga duna siyay plano nga maggobernador dinhi.

Kun ang pagparehistro lay basihan dili ni garantiya nga dili tinuod ang mga tabi-tabi. Kini tungod kay layo pa ang 2028 ug duna pa siyay igo nga panahon aron mobalhin sa pagparehistro dinhi sa Sugbo.

Usa ka butang ang tataw sa pagkakaron, wa nay alyansa tali sa gihilugway nga defacto president ug sa kampo ni outgoing Governor Gwen Garcia.