Mas ngil-ad ang solusyon

Mipasaka si Senador Jinggoy Estrada og balaodnon nga magwagtang na sa mandatory Senior High School (SHS) level ubos sa K to 12 program.  Nagkadaghan ang sektor nga uyon nga tangtangon na ang K to 12 program kay, gawas nga pakyas kini sa pagkab-ot sa iyang tumong ug katuyoan, dili usab ikalimod ang dugang kahasol, gasto ug sakripisyo sa mga ginikanan ug tinun-an tungod niini.  Komento pa sa akong amigo, “Ang K to 12 program maoy klasiko nga ehemplo nga ang solusyon sa gobiyerno sa problema sa edukasyon mas ngil-ad pa sa problema nga buot niini sulbaron.”  Fezteleern!

 Wala na’y manarbaho

Segun sa ulahing datos sa Philippine Statistics Auhtority (PSA), adunay natala nga 2.06 milyon ka Pilipino kon 4.1% ang walay mga trabaho sa bulan sa Abril 2025.  Misaka kini’g diyotay gikan sa bulan sa Marso nga aduna lama’y 3.9% nga walay trabaho.  Dili kaha kini’ng pagdaghan sa walay trabaho tungod kay nagsingabot man ang eleksyon sa bulan sa Mayo, kay nagpaabot na lang ang tawo sa kwarta sa mga kandidato ug sa daghan’g mga ayuda sa gobyerno?  Matud pa bitaw sa akong silingan, “Sa kadaghan sa ayuda, kinsa pa ma’y ganahan motrabaho?”  Pagka-hajahay!

 Dugang budget ni mrs.

Supak ang mga kahugpongan sa magpapatigayon sa P200 ka pesos nga legislated wage increase nga giaprobahan na sa kongreso.  Matud pa nila, ang legislated wage increase dili makahatag benepisyo sa mga mamumuo labi na kadtong anaa sa informal sector ingon man dugang palas-onon usab kini sa mga negosyante.  Komplikado gayod ang hisgutanan sa pagpausbaw sa suholan.  Apan matud pa sa akong amigo, “Malipay gayod si Misis kon patas-an na ang sweldo kay modako-dako na man ang iyang budget para sa Shoppee ug Lazada.” Muleeng!

 Adunay lahi’ng kahulogan

Nanawagan si Cebu Archbishop Jose Palma sa publiko nga magmatngon ug magpakisayod sa sakit nga HIV/AIDS ug nga atubangon kini nga puno sa gugma ug pagsabot taliwala sa nagsaka nga kaso niini.  Gisalikway usab sa Arsobispo ang pagtoo nga usa ka matang sa silot kon mataptan ang tawo sa HIV/AIDS.  Mahukmanon ang tawo busa, bisan ni’ng pamahayag sa Arsobispo, daghan gihapon ang nagtoo nga gisilotan ang tawo nga nataptan og HIV/AIDS.  Napagya na man gani nga ang kahulogan sa AIDS mao nga “Ang I_ot Dunay Silot.”  Madahaan!

 Mora’ g vending machine

Gahinan og pundo sa gobyerno ang barko nga MV Mamalakaya aron maoy sakyan sa mga kumprador nga direktang mokumpra sa mga isda nga makuha sa mga mananagat sa West Philippine Sea (WPS).  Tuyo sa BFAR nga mahatagan og kasayon ang mga mananagat pagbaligya sa ilang kuha.  Hinaut nga dili mosalir ang palakasan system sulod sa BFAR diin ang mga suod lang hinoon nga negosyante ang makapahimulos ug dili ang tinuoray nga mga komprador.  Kay ginaingon baya nga “Ang uban’g opisyal sa gobyerno mora’g vending machine, kon sudlan nimo’g maayohon, makapangayo ug makadawat pud ka kanila’g mas daghan pa’ng maayohon.”  Pagkatoytoy!