Makalilisang nga umento
Sakto ang pasidaan si Cebu City Mayor-elect Nestor Archival nga -mabangkarota ang Metro Cebu Water District (MCWD) kon padayong magbayad og mahal sa ilang gikontrata nga water suppliers pero ibaligya og mas barato ngadto sa mga konsumidor.
Pero sayop ang pasumbingay nga mabasol sab ang mga konsumidor. Maong iyang patudloan unsaon pagbantay ang inadlawng konsumo aron nga dili mosulbong ang ilang bayranan. Mas makiangayon nga iya unang imbestigahon unsa kamakiangayon ang presyo sa tubig sa MCWD ug kon wala bay naka-komisyon sa mga transaksiyon uban sa pribadong suppliers sa tubig.
* * *
Dili kapasanginlan ang mga konsumidor sa pag-usik-usik. Silay labing nagdaginot tungod sa kagamay sa kita. Sa walay paghisgot sa kanihit sa suplay sa tubig, nga hinayng moagas sa kadlawong dako sulod lang sa usa o duha ka oras.
Makumbinser hinuon silang Archival pagbayad sa mas taas nga presyo kon kahatagan og mas kasaligan nga serbisyo. Dili sila magsapayan pagtakilid sa mas dakong bayranan bugti sa pag-agas sa ilang mga gripo kon gikinahanglan na sa ilang pamilya. Labi na kon maseguro nga wala patongi sa pangurakot ang ilang water bills.
* **
Nangulo si Archival sa City Council pagpangayo og kopya sa mga kontrata sa MCWD suppliers. Pero gilipat-lipat sa management. Bisan sa sulti sa City Legal Office nga public documents ang mga kontrata. Inig banos ni Archival sa City Hall karong Hunyo 30, dili nang kabalibaran.
Hinaot magtinabangay silang Governor-elect Pam Baricuatro pagsusi sa pasangil nga gipaburot pa gyong taas nang daan nga presyo sa suppliers kay nangayo og bahin ang pipila ka opisyal sa MCWD.
* * *
Usa sa labing misteryusong mga transaksiyon sa MCWD mao ang makalilisang nga pagmahal sa tubig gikan sa Luyang River sa Carmen sa amihanang Sugbo: Gikan sa P24 kada cubic meter sa orihinal nga supplier (Cebu Manila Water Development) ngadto sa P58 kada cubic meter sa bag-ong supplier (Manila Water Philippine Ventures).
May sukaranan ang kahibulong ni Archival nganong nisugot ang MCWD sa 240% nga uminto sa presyo. Kasaligan namong tinubdan nagbutyag nga nakigkonsabo ang pipila ka opisyal sa MCWD sa bag-ong kompaniya. Kansang mga tag-iya gikatahong naglakip sa labing gamhanang mga politiko ug mga negosyante sa Sugbo.
* **
- Latest
