Tinuod nga nuisance
Wala mopasaka og election protest si outgoing Governor Gwen Garcia batok ni Governor-elect Pam Baricuatro. Bisan pa kon ang mga dumadapig ni Garcia nangangkon nga gimaniobra ang automated counting machines (ACMs) sa Sugbo aron pag-ihap sa mga boto ni Garcia pabor ni Baricuatro.
Ang kapakyas ni Garcia pagpasaka og protesta sa wala pang tagal nga gitakda sa Commission on Elections (Comelec) mahimong nagpasabot nga wala silay ebidensiya. Pero ang pagdumili sa pagtunol sa mga dokumento nga gipangayo ni Baricuatro nagtimaan nga wala pa gyod makadawat si Garcia sa iyang kapildehan.
* * *
Ambot tungod ba sa paugat ni Garcia, o duna silay nakuha nga mas klarong kasayuran, nipasangil ang kampo ni Baricuatro sugod niadtong Domingo nga nagplano si Garcia, uban ang tabang sa administrasyon ni Presidente Ferdinand Marcos Jr., sa pagbasura sa resulta sa eleksiyon ug pagpalagpot ni Baricuatro.
Wala sila mohatag og mga detalye sa ilang nahibaw-an nga plano ni Garcia. Maong nangutana mi sa mga eksperto sa mga lagda sa eleksiyon unsa na man lay nahibilin nga kadangpan ni Garcia human siya napakyas sa pagpugong sa proklamasyon ni Baricuatro?
* * *
Gilista sa mga abogado ang posibleng mga lakang ni Garcia batok ni Baricuatro:
Continuing Disqualification (ubos sa Section 68 o Section 78 sa Omnibus Election Code) pinasikad sa disqualification case nga gipasaka ni Garcia batok ni Baricuatro sa wala pang eleksiyon;
Pag-anular sa eleksiyon (kon makamatuod sa terorismo ug lapad nga kagubot ug pagpanikas sa eleksiyon niadtong Mayo 12); ug
Quo warranto (nga molampos lang kon dunay problema sa citizenship o nakonbikto og kasong kriminal si Barcicuatro).
* * *
Para sa mga abogado, kinahanglang pamatud-an ni Garcia ang kasong disqualification. Kay kon ipatigbabaw sa Comelec, bisan kon makalingkod na si Baricuatro, tangtangon siya sa Kapitolyo ug ang ikaduhang labing daghan og boto (si Garcia) maoy mopuli.
Wala koy detalye sa kaso ni Garcia. Ako rang nahibaw-an nga iyang giawhag ang Comelec pag-disqualify ni Baricuatro kay nuisance (o kandidata nga nagbugalbugal sa eleksiyon ug walay katakos pagpangampanya). Ang opisyal nga ihap sa Comelec–1,107,924 ka boto ni Baricuatro, labaw og 342,873 sa nakuha ni Garcia nga 765,051 ka boto–maoy lig-ong ebidensiya nga sayop ang pasangil.
* * *
- Latest
