Mao ni mayo

Pagka nindot sa nahukman nila ni Cebu City Mayor-Elect Nestor Archival ug Vice Mayor-Elect Tomas Osmeña nga angayon ang paghatag og chairmanship sa mga komitiba sa City Council ang tanang konsehal, apil na ang mga sakop sa minority.

Wa kini mahimo sa nangaging administrasyon kay ang nahitabo, kadto ra nga mga konsehal nga sakop sa majority maoy gipagunit og mga chairmanship sa lainlaing komitiba. Tungod niini, dunay mga konsehal sa minority nga wa na lang sab midawat bisan og member sa mga komitiba.

Gibutyag ni Archival nga nakigtagbo na diay sila sa mga konsehal nga midaog sa miaging election ug gipahibawo nila sa nahukman nilang Tommy nga putlon na ang karaang pamaagi nga ang chairmanship adto ra ihatag sa mga konsehal nga sakop sa majority.

Pagka nindot. Kon ingon niini ang mahitabo, tan-aw nako makuha gyud sa Bando Osmeña Pundok-Kauswagan (BOPK) ang mayoriya diha sa City Council ug dunay mga konsehal nga motipon sa ilang politikanhong grupo.

Pagka karon, pareho ang BOPK ug ang Kugi Uswag Sugbo-Panaghiusa nga dunay tag unom ka konsehal, ug upat ang alyado sa Barug-Team Rama. Hinuon, tan-aw nako, ang committee on laws adto gyud na itugyan kang Councilor-Elect Sisinio Andales nga alyado sa BOPK.

Ambot kinsa kaha sa mga konsehal ang tugyanan nila sa committee on budget and finance. Wa ko kahibawo kon duna bay konsehal diha nga accountant sama nila ni Konsehal Noel Wenceslao ug Joy Pesquera.

Kon wa gu’y kasinatian sa iyang komitiba ang konsehal, aw igo ra siyang magbasa sa report nga giandam sa iyang executive assistant.

Apan nakasiguro ko nga mapangitaan ra kini og sulbad. Gidayeg sab nako si Mayor Raymond Alvin Garcia kay mipadayag gyud kini og kaandam nga moabag sa administrasyon ni Archival.

Para nako, kon ako’y Archival sila si kanhi mayor Mike Rama, Yogi Ruiz ug si Garcia maayong kuhaon sa lainlaing katungdanan sa Cebu City government human sa usa ka tuig gikan kaniadtong eleksiyon. Bahin ni Rama mahimo lang kini kon moangkon na siya nga pilde.

Kay si Rama ra ba miduso pa og election protest sa Commission on Elections (Comelec) kay wa siya makadawat sa iyang kapildehan. Buyno, iya sab na nga katungod kay nagtoo man siya nga may binuang sa Automated Counting Machine.

Atong klarohon, wa sab mamasangil si Rama nga sila si Archival ug Garcia maoy nanikas, apan gusto lang niya nga dunay “manual counting” sa mga botos nga ipahigayon.