Gobernador sa Katawhan

"I don't want to be referred to as honorable, but as a People's Governor." Mmao kini ang linya ni incoming Governor Pamela Baricuatro human sa iyang pagpanumpa sa katungdanan kagahapon sa buntag diin gihimug-atan niya nga haum lang nga ibalik sa katawhan ang dungog ug dili kaniya sanglit ang mga tawo man ang nagpili kaniya nga mabutang sa katungdanan. Sa higayon nga makalingkod na siya sa pwesto sa kapitolyo mopagawas, matud pa, siya og executive order nga wagtangon ang titulo nga honorable kaniya isip pagpakita nga seryoso siya sa iyang tinguha.

Kong masustiner kini sa bag-ong gobernador ug dili siya mausab nindot pamation nga ang labing gamhanan sa lalawigan sa Sugbo nakig-level sa mga yanong tawo aron dali siyang maduolan ug dili katahaan nga maabot bisan kadtong mga anaa sa ubos kay siya man gani ang mopaduol sa mga tawo. Gani gusto sa bag-ong gobernador nga tawgon lang siya sa iyang ngalan ug dili na gobernador kay alang kaniya dili mahinungdanon ang titulo kon dili ang serbisyo sa mga tawo.

Usa kini sa atong bantayan ug kong mausab siya atong sukmatan ini’g abot sa panahon kay ang tanan recorded ra ba. Bitaw hatagan nato og higayon ang bag-ong gobernador nga makapakita sa iyang katakos ug asa kutob iyang maabot. Dili kinahanglan nga hukman siya daan nga wala pa gani makasugod sa iyang katungdanan.

Si Baricuatro nihurar sa iyang katungdanan atubangan sa suod niyang higala ug kanhi classmate sa college nga si Judge sa Anna Marie Militante sa Regional Trial Court Lapu-Lapu City pasado alas 9 kagahapon sa buntag nga gitambongan sa iyang pamilya, mga suod nga higala ug mga supporters.

Lakip sa mitambong ang kanhi Tourism Secretary Ace Durano kinsa midawat na sa katungdanan nga gisangon kaniya isip Special Adviser for Economics and Political Affairs kon SAEPA. Matud ni Durano nga midawat siya sa tahas sanglit mituo siya sa adbokasiya ni Baricuatro nga mao ang pagtutok sa kahimtang sa panglawas sa katawhan nga angayang suportahan. Mipasalig ang kanhi kalihim sa turismo nga matuman sa Baricuatro administration ang gipanaad niini sa katawhan atol sa kampanya.

Samtang mitambong sa kalihokan ang kanhi National Security Adviser Norberto Gonzales nga gitinguhang ibutang sa bag-ong gobernador isip security adviser sa Kapitolyo. Wala hinuon masuta kong gidawat na kini ni Gonzales.

Ang pagkuha sa serbisyo sa Baricuatro administration sa mga kanhi opisyal nga aduna nay napamatud-an makatabang kaayo sa pagpadagan niya sa pangagamhanan, ilabi na nga gilauman nang daan nga tunokon ang agianan sa bag-ong administrasyon tungod sa kontra niini sa politika.

Sa akong giingon na nga mas palig-onon si Pamela ang iyang taming sa mga posibleng mahiagauman niini atol sa iyang paglingkod isip gobernador sa lalawigan sa Sugbo. Kong mahimo ang ipamutang niya sa frontline kadtong mga experto gyud aron magamit niya sa opensa ug depensa sa higayon nga makaatubang og dagkong pagsuway ang iyang pangatungdanan sa Kapitolyo.

Atong nalang atngan ang sunod nga mahitabo sa bag-ong administrasyon sa lalawigan sa Sugbo kong matuman ba ang iyang mga gipanaad. Dili man seguro perpekto pero aduna gyuy timailhan nga matuman.