P1.2 bilyones ni Glenn Soco
Tabang mo og bantay. Kay duna pay kapin sa buwan si outgoing Cebu Governor Gwen Garcia sa pagpalusot sa iyang gipangayo nga P1.2 bilyones nga supplemental budget patong sa naaprobahan nang P25 bilyones nga budget para sa tibuok tuig 2025.
Hangtod sa akong pagsuwat niini, wala mohatag ang Kapitolyo sa mga detalye sa bag-ong gastohan. Pero niangkon nang board members nga ang labing dakong bahin sa pundo ihatag sa upisina sa bise gobernador. Kansang mga trabaho ubos sa Local Government Code wala maglakip sa pagpatuman og higanteng mga proyekto.
* * *
Gipahiyos sa Kapitolyo ang implikasyon sa pag-boykot sa board members sa sesyon niadtong Miyerkules. Kasagaran kunong mahitabo kada human sa eleksiyon kay nibiyahe sa ubang kanasuran o namahuway sa kapoy nga kampanya ang board members.
Sa wala pa ipatawag ang special session, labi na kay gideklarar ni Garcia nga dinalian ang supplemental budget, giklaro na g'yud untang dunay quorum. Nataligam-an ba lang kay nagsalig nga moyango ang board members bisan unsay isugo ni Garcia? O nisaad pagtambong pero nisibog ang mayoriya kay dili moapil pagsabotahe sa mopuli nga administrasyon?
* * *
Dili para ni outgoing Vice Governor Junjun Davide ang kuwarta. Kapin sa buwan na lang siya sa puwesto. Gawas pa, wala siya hatagi og respeto. Bisan sakop sa provincial board, gidid-an si Davide pag-apil sa deliberasyon ug pagpasaka og mga resolusyon ug ordinansahon.
Si Vice Governor-elect Glenn Soco, ang paboritong running mate ni Garcia, ang tinuod nga mabuhong sa pundo. Aron sab ma-inutil si Governor-elect Pam Baricuatro pagtuman sa iyang saad pagpalambo sa health services.
* * *
Kon maaprobahan gyod ug si Soco ang magbuot unsaon paggasto ang P1.2 bilyones, mahimo siyang:
• Magpasiugda og upat ka Pasigarbo sa Sugbo nga mogasto og P255 milyones kada usa (nga si Garcia gihapon ang mangulo, magbuot mo); ug
• Molusad og binuwan nga Suroy-Suroy Sugbo (nga, nakatag-an mo, si Garcia gihapon maoy sentro) sugod sa Hulyo hangtod sa Disyembre karong tuiga.
Pero kon maminaw og tarung nga tambag si Soco ug makaangkon og kaisog pagsukwahi ni Garcia, mahimo sab siyang magtukod upat ka 100-bed hospitals (tag-P200 milyones kada usa) o 600 ka classrooms (tag-P2 milyones kada usa).
* * *
- Latest
