Makig-uli, unsa?

Gusto nga makig-uli si Presidente Ferdinand R. Marcos Jr. sa mga Duterte. Daghan na siya og kaaway maong dili na siya gusto og kaaway, gusto niya higala. Kini ang sulti sa Presidente sa iyang interview.

Ang sulti sa Presidente maingon nato nga bunga sa iyang pamalandong human sa kapildihan sa daghan niyang kandidato sa pagka senador bisan pa man sa iyang pagpangampanya kanila.

Ngano kaha nga midaghan man ang mga kaaway ni Presidente Marcos Jr.? Kinsa man ang nagmugna sa daghan niyang kaaway?

Hinuon, wala klaroha sa Presidente kun kinsa kining daghan niyang kaaway, kaaway ba sa politika, personal o unsa ba.

Balik ta sa iyang pagpakig-uli sa mga Duterte. Motoo mo? Seryoso ba siya niini? Sayon lang kini isulti sa Presidente pero lisod kini sa habig sa mga Duterte.

Human matabangi sa mga Duterte aron mahimong Presidente, gidunggab ni Presidente Marcos ang mga Duterte.

Gikan sa inahan Presidente Corazon C. Aquino hangtod sa anak Presidente Benigno Simeon C. "Noynoy" Aquino III, wala makapauli sa Pilipinas ang patayng lawas sa dektador nga si Presidente Ferdinand E. Marcos Sr.. Si Presidente Rodrigo R. Duterte lang ang nakapapauli dinhi sa Pilipinas sa patayng lawas sa dektador ug gipalubong pa sa libingan nang mga Bayani.

Gipa-impeach si Bise Presidente Sarah Duterte ug gipadakop ni Presidente Marcos ang kanhi Presidente Duterte ug gipapriso didto sa The Hague, Netherlands.  Kun ikaw ang naa sa mga Duterte, imo bang mapasaylo si Presidente Marcos ug mosugot ka nga mag-uli mo?

Naa pa uroy nawong nga mobuhi og pakig-uli sa mga Duterte si Presidente Marcos.