Mao ni ang husto

Nindot ang pamahayag ni Cebu City Mayor Raymond Alvin Garcia nga ang mga kaalyado niyang mga konsehal nga midaog sa miaging eleksyon dili magsilbi nga “obstructionist” sa mga proyekto ni incoming Mayor Nestor Archival.

Matud ni Raymond nga kon makita nila nga makahatag og kaayohan ang proyekto sa umaabot nga administrasyon, natural nga suportahan kini sa unom ka konsehal nga kaalyado sa Kusug-Panaghiusa, apan kon makita sab nila nga dili kini maayo, aw supakon sab nila.

Tan-aw nako nindot ang han-ay sa City Council nga magsugod karong Hunyo 30, kay unom ka konsehal ang kaalyado sa Kusug-Panaghiusa, unom sab sa Bando Osmeña Pundok-Kauswagan (BOPK) ug upat sa Barug-Team Rama.

Pero napanglantawan nako nga dunay problema kon kinsa ang tugyanan nila nga mag-chairman sa Committee on Budget and Finance nga dunay kahibawo sa maong trabaho. Unsaon, wa man makadaog sila si Konsehal Noel Wenceslao ug Joy Pesquera.

Sila si Wenceslao ug Pesquera maoy batid kaayo sa pagdumala sa committee on budget and finance kay mga accountant sila. Kon ang konsehal nga tugyanan niini nga komitiba way kasinatian sa gimbuhaton, aw igo ra siya magbasa sa gihimo sa iyang consultant.

Sa committee on laws, way problema kay naa man si Atty. Mikel Rama, ug naa sab si Atty. Sisinio Andales nga makadumala. Bahin sa committee on peace and order, pwede nga itugyan kini kang Councilor-Elect Paul Labra nga usa ka heneral sa kapolisan sa wa pa molansar.

Pero panid-an lang nato kay basin og dunay mga nakatungha og accountancy diha sa mga bag-ong nakadaog nga konsehal.

* * *

Dunay miingon nga basin og bakikaw si Vice Mayor-Elect Tommy Osmeña nga mo-preside sa City Council. Ang akong ikasulti nga si Tommy utokan ug dali ra makat-on.

Apan ang nabalak-an lang nako kon dili ba kaha siya mapikal nga igo lang mag-agad sa hukom sa kinabag-ang sakop sa City Council, ilabi na kon dunay mga kontrobersyal kaayong hisgotanan?

Si Tommy gud naanad sa executive, nga siya gyud maoy momandar, apan lahi ang trabaho sa pagka vice mayor. Dili sab ko motuo sa pagduda sa uban nga moabot kuno ang adlaw nga mo-resign si Mayor-elect Archival aron nga si Tommy na maoy mobanos nga mayor.

Mora’g lisud katoohan ang maong pangagpas sa uban. Kon mahitabo na, aw mosaka pagka bise mayor si Dave Tumulak? Pero usbon nako, wa gyud ko magtoo nga mahitabo nga mo-resign si Archival pagka mayor aron ihatag kang Tommy ang puwesto.

Sigurado ko nga wa sa plano ni Tommy nga mao kana ang mahitabo. Gusto ni Tommy nga tudloan si Archival sa maayong pagpadagan sa kagamhanan sa siyudad.