EDITORYAL - Makadaut sa Cebu BPO

Nag-viral karon sa social media ang post sa usa ka nangangkong hacker nga mi-expose sa matud scamming operation sa usa ka business process and outsourcing company nga nagbase dinhi sa Cebu City.

Ang maong video gi-post diha sa YouTube nga gi-pickup sab ug gi-share diha sa Facebook nga paspas kaayong mikatap mura og gidaubang kagunonan sa udtong tutok.

Ang video nagpakita sa pipila ka mga BPO employees nga mga babaye ug mga lalaki nga mga Filipino sa sulod sa ilang trabahoan nga adunay daghang mga computers.

Matud pa sa nag post, nalambigit og scamming operation sama sa fake investment website ang maong kompanya nga ang mga biktima gikan sa ubang nasud.

Ang maong hacker nakakuha og access sa mismong CCTV camera sa sud sa maong BPO company nga nagpakita lang nga kining maong tawo taas og kamahoan sa cyber technology.

Gani hasta ang 14 ka pahinang scripts nga basahuhon sa call center agent nakuha sab niya ug gi-post sab niya kini.

Gani bisan makapila na nagbalhin-balhin og lokasyon ang maong kompanya nasundan ug na hack gihapon niya kini.

Giangkon sa maong hacker nga nakakuha siya og access sa mismong “Boss” sa maong BPO company ug duha niini ka call center agents.

Hinuon pagkahuman mokatap ang maong video, gimando ni Cebu City outgoing mayor Raymond Alvin Garcia ang pagpasirado niini hinungdan nga gironda kini sa kapolisan kagahapong adlawa, Mayo 20,2025.

Samtang maayo kining gihimo sa hacker kay gi-expose niya ang matud pa niya “pagpang scam,” bawal dinhi sa Pilipinas ang iyang pamaagi nga mang-hack subay sa atong Cyber laws.

Apan ang maong video makapahiubos ug makaalarma para sa Cebu. Kini tungod kay ang BPO maoy usa sa gisaligan sa daghang mga pamilyang Sugbuanon.

Dinhi sab nagkuhaan og pang tuition ang daghang mga kabataang kabus nga gustong makahuman og kolehiyo.

Maayo unta og aksyonan kini sa mopuling administrasyon sa Cebu City nga nisaad nga palambuon ug atimanon ang BPO kay nakahibalo silang maayo kini para sa mga Sugbuanon.