Dili takdo

Gipanghambog sa liderato sa Ubos Balay Balauranan nga 86 porsiyento o usa ka gatos (100) sa mga kongresista nga mipirma sa impeachment batok sa bise presidente napili pag-usab sa pagka kongresista. Klaro ang mensahi sa liderato sa Ubos Balay Balauranan, gusto nilang ipaabot nga nakauyon sa ilang gihimo ang katawhan sa mga distrito diin napili ang mga kongresista maong nakadaug sila.

Pero lahi ang resulta sa piniliay sa Senado nga mao ang magsilbing huwes sa impeachment sa bise presidente.

Tungod kay kasagaran sa midaug mga kaalyado ni Bise Presidente Sara Duterte ug dumadapig kaniya.

Kun maoy basihan sa mga kongresista sa ilang pangangkon nga miuyon ang mga tawo sa ilang pag-impeach sa bise presidente, nganong ang mga kandidato man sa pagka senador nga dili gusto nga ma-impeach ang bise presidente ang midaug?

Dili ba wala kini motakdo sa pangangkon sa mga kongresista?

Daghan nga rason nganong midaug ang mga kongresista nga mipirma sa impeachment. Una, wala silay kontra.

Ikaduha, kun may kontra man, ang ilang mga kontra dili makaapas sa gidaghanon sa ilang nagtapunog nga salapi.

Ikatulo, naa g’yud pod hinuon kanila ang nakapaabot sa ilang maayong serbisyo nga didto  sa katawhan.

Ang bola sa impeachment anaa na katon sa mga kamot sa mga senador.

Sila na karon ang nagkupot sa kapalaran sa bise presidente.