Napul-an na

Usa ka semana na human sa nakalabay nga eleksiyon apan dili gihapon makatuo ang bagang duot sa katawhan sa migawas nga resulta sa piniliay, ilabina sa pagka gobernador sa lalawigan sa Sugbo.

Kini gumikan kay ang walay kasinatian ug kulang sa resources ug bagito sa politika ang mipalukapa sa sapian, tang-an ug nanggungis nga politiko nga wala pa g'yud mapildi sa bugnong lugaynon dinhi sa probinsiya sa Sugbo

Tinuod nga ang makabungog nga kadaugan ni Pamela Baricuatro batok kang Gobernadora Gwendolyn Garcia usa ka panghitabo nga nakapahibulong pag-ayo dili lamang sa milyones nga  Sugboanon kondili sa halapad nga hut-ong sa katawhang Pilipino.

Hinuon, niining maong dakong kalamboan, ang kadaugan ni Baricuatro isip bag-ong gobernador sa Sugbo nagpakita lamang og timailhan nga ang kinabag-an sa katawhan gusto na og kabag-ohan sa liderato sa lalawigan.

Si Baricuatro nakakuha og 1,107,924 ka boto, samtang si Garcia nakakuha lamang og 765,051 ka boto. Halos ang tanan dili makatuo sa maong resulta kay nag-expect sila nga mamunbon gayud si Baricuatro.

Apan usahay dili gyud nato matag-an ang dagan sa politika. Bisan sa iyang kawad-on, miani si Baricuatro og makalilisang nga suporta gikan sa gatusan ka libo ka mga Sugboanon kinsa naghandum na og tinud-anay nga kausaban.

Dili gayud ikalimod nga napul-an na ang mga Sugboanon sa estilo sa pangatungdanan ni Garcia. Gani, baniog na ang mga taho nga ang dili maayong batasan ni Garcia ang usa sa hinungdan sa iyang kapildihan.

Ang kapildihan ni Garcia magsilbi nga leksiyon niadtong mga anaa sa katungdanan kinsa nahubog na sa gahum ug nakalimot na sa ilang unang obligasyon sa katawhan nga mao ang tinud-anay nga pagserbisyo.