Ayaw hugawi dayon imong imahe

Human na ang 2025 midterm election. Dinhi sa ato, ang incumbent provincial Cebu governor, Gob. Gwen Garcia, kinsa namatud-an nang lig-on kaayo ang pundasyon sa pagpamunoan ug tadhan na sa mga pamaagi unsaon sa pagdaog, gilupig lamang og usa ka Pamela S. Baricuatro, humok pa’g tahod sa natad sa politika ug wala gani mailhi sa kinabag-an kinsa siya. Hinungdan, kompiyansa ra ang mga lunod-patay’ng dumadapig ni Gob. Gwen.

Apan dihang si Pam gisugda’g away ug saway ni Gob. Gwen ug sa iyang igsuong blogger, kutob sa mga Sugboanong viewers-vloggers-subscribers nga nakakita niini sa social media, sila naikag sa pag-search-ukay bahin sa kinatibuk-ang pagkatawo ni Pam diha sa Facebook, YouTube, Twitter, Tik Tok ug uban pa.

Ug gumikan niini, ang kadali rang midaghan ug midaghan pa pagsamot ang naintriga-nainteresado dihang ilang nasayran nga inindorso diay si Pam ni kanhi Presidente Rodrigo Roa Duterte, kinsa taliwala sa kadaghang politiko nga gitabangan panahon sa iyang pagpamunoan, mayoridad mitraydor kaniya dihang si Presidente Bongbong Marcos Jr. nay milingkod sa Malakanyang, kinsa maoy una ug numero uno sab kamabudhion. Resulta?

Milyon kapin nga diehard Duterte supporter, kinsa hagbay rang giluod-nangasuko sa administrasyong Marcos ang mihatag og walay kinutobang suporta ni Pam.

Diha sa ilang vlogs nga gipaambit ug gipasapasa nila sa social media, ilang gildlad-gipasalida unsa ka soft-spoken, friendly ug kamapaubsanon ang nahuptang kinaiya niini. Nga lahi ra kaayo sa unsay naa ni Gwen. Diin, segun pa sa political analysts maoy hinungdan sa makabungog nga kadaogan ni governor-elect Pam Baricuatro.

Pero, hangyo lang. Nindot unta likayan ni Pam ang pagsulogsulog-pang-asar ni Gwen sama sa pag-ingon: “Babay, Lang! Bye-bye, Lang!” o uban pa. Angay hinumdoman nga anaa pa siya sa tumang kaguol tungod sa mao niyang kapildehan.

Dapat, hapuhapon siya, i-comfort! Nungkang, dugangan pag samad iyang kasingkasing. Dili ba, miingon ang Ginoo: “Love your enemies.”?

Gob. Pam, ang imong kamahigalaon-kamapaubsanon-kamasinaboton mao bayay nakapadaug nimo. Unya gusto ka pod og unity or panaghiusa, dalaygong hiyas sa usa ka buotang lider.

Ug mahiusa mo lamang tanang department heads, kaempleyadohan sa Kapitolyo ug tanang mayor sa probinsiya sa Sugbo kon magpabilin kang aduna niining mga kinaiyaha.

Intawon, ayaw hugawi dayon imong imahe!