EDITORYAL - Cebu, DDS country na?

Nakadaog si Governor-elect Pamela Baricuatro batok sa beterananang si outgoing Governor Gwendolyn Garcia. Ug ang mga tawo pa maoy pasultihon, mura og David batok Goliath ang tapad, mao nga tinuod gyud ang panultihong walay dako nga makapuling.

Si Baricuatro bagito pa kun itandi kang Garcia kinsa halos 20 ka tuig tuig sa kinabuhi niini naa sa panggobiyerno ug sa politika puli  sa amahang si kanhi gobernador Pablo Garcia.

Ang background sa politika ni Baricuatro, wala, kay 27 ka tuig siyang flight attendant ug ning bag-o lang nagapil-apil sa politika dihang nasuod siya sa mga Duterte sa Davao.

Kinsa may magtuo aning iyang background makabuntog kang Garcia sa bag-ohay lang natapos nga mid-term elections? Daghan ang nag-ingon nga tungod kay gidala niya ang pangalan ni Duterte ubos sa PDP-Laban.

Nakatabang kini og dako sa iyang kampanya kay daghan ang wala na ganahi kang Garcia kinsa dayag kaayo nga adto kini dapig kang Presidente Ferdinand Marcos Jr. sukad nga niaslom ang relasyon nilang Bise Presidente Sara Duterte-Carpio.

Apan isip inahan sa probinsya, ang gibuhat ni Garcia masabot nga para kini sa kaayohan sa Probinsya sa Sugbu. Natural gyud nga adto siya dapig sa presidente kay mao may labing taas nga opisyal sa nasud. Apan lahi ang pagsabot ani sa mga supporters sa pipila sa mga Duterte, “pipila” kay dili man matawag nga solido ang Sugbuanon nga “DDS.”

Bisan gilubong ni Baricuatro si Garcia pinaagi sa iyang 1.1 milyon kapin nga boto batok sa kapin 765,000 sa naulahi, ang mga kandidatong nanagan ubos sa PDP-Laban sa lokalidad nangaparot man.

Maayo nga pagka-gobernador ang gidaganan ni Baricuatro kay kinabag-an sa mga Sugbuanon gusto na og kausaban diha sa Kapitolyo. Apan pabilin silang loyal sa ilang local leaders bisan sakop pa ni sila ni Garcia. Mao kini ang kinahanglang serbisyohan ni Baricuatro ug dili ang mga Duterte, kay ang nagbutang kang Garcia sa pwesto mao ra sab ang nagtangtang kaniya.