Gwen Garcia ug Tom Jones
Mapugngan pa ba ni governor-elect Pam Baricuatro ang pagpatuman sa plano ni outgoing Governor Gwen Garcia sa pagbalhin sa Capitol building gikan sa Cebu City ngadto sa Balamban? Duna ba siyay gahom sa paghunong sa uban pang kontrobersiyal nga mga proyekto ni Garcia?
Bisan napilde sa eleksiyon, hingpit ang pagkontrolar ni Garcia sa Provincial Board (PB), gawas lang kon mobalitok ang mayoriya sa board members. Makausab pa ba o maggapos na si Baricuatro sa tanang nalista nga gastohan sa P25 bilyones nga budget sa probinsiya karong tuiga?
* * *
Gipasidan-an na si Baricuatro sa mga alyado ni Garcia nga ma-inutil ang iyang administrasyon sa mosunod nga tulo ka tuig. Gipahinumdoman nila si Baricuatro nga ang PB maoy magbuot sa panudlanan sa Kapitolyo kay ang gobernador igo lang nga mosugyot pero ang PB maoy moaprobar sa tinuig nga budget.
Magamit bang Baricuatro ang makabungog nga mayoriya nga nadaog sa niaging eleksiyon sa pagkumbinser sa PB sa pagsuporta sa iyang gisaad nga kausaban, apil nang pagpalambo sa gipasagdan ni Garcia nga mga serbisyo sa provincial hospitals ngadto sa labing nagkinahanglan nga mga pasyente?
* * *
Sa gipasalig ni Baricuatro nga komprehensibong audit sa mga transaksiyon ni Garcia, mahibaw-an na gyod sa Sugbuanong mga magbubuhis:
Unsay papel ni Garcia sa pag-upaw ug pagpatag sa kabukiran sa Balamban para sa bag-ong Kapitolyo;
Tinuod bang mas dako ang tinuig nga budget sa public information office (nga gitawag sab og TikTok department) kay sa provincial engineering office; ug
Tinuod bang kapin sa P200 milyones ang gasto sa usa ka adlaw nga paukyab ni Garcia sa Pasigarbo sa Sugbo kada Agosto.
* * *
Human nakakuha og temporary restraining order (TRO) gikan sa Court of Appeals (CA) batok sa preventive suspension order sa buhatan sa Ombudsman, tunga sa buwan human sa gitakdang pagsugod unta sa iyang unom ka buwan nga suspenso niadtong Abril 28, maka-insistir na si Garcia nga dili siya angay’ng tawgon og suspended.
Pero dili kalalis sa bag-o niyang titulo nga gisugyot sa mga Sugboanon nga na-eskandalo sa iyang pagpilit sa puwesto: Tom Jones. Kay sa gusto niya o sa dili, bisan magpalaban pa sa tanang korte, dili na mausab nga taman na lang siya sa Hunyo.
* * *
- Latest
