EDITORYAL — Eco-friendly

Magpaabot ang mga konstituwente sa Cebu City og dakong kausaban ubos sa pamunoan ni Mayor- elect Nestor Archival.

Usa niini kaning panginahanglan nga himuong eco-friendly ang siyudad para sa tanan.

Ang labing una nga kinahanglang sulbaron ang problema sa baha.

Apan una pa kini mahitabo, angay unahon ang saktong paghipos sa basura, kay kun kini matarong gikan palang sa koleksyon gikan sa mga barangay ug mga establisamento, gamay nalang ang trabahuonon sa mga kanal, mga sapa ug tanang agianan sa tubig.

Makapila na nakita nga kuwang ang paglapad o pagpalawom, pagpapahawa sa informal settlers ug pagbawi sa 3-meter easement zones sa mga sapa ang solusyon sa baha.

Kadtong mga epektibo o nakitang dako og potensyal nga mga solusyon apan wa mahatagi og 100 porsiyentong suporta o implimentasyon, kinahanglang ipadayun ug palambuon.

Mahimo sab unta nga sumbanan ang siyudad sa paggamit og renewable energy aron mosunod sab ang publiko.

Sama sa paggamit og electric vehicles, solar lights sa mga suga sa kadalanan,  environment-friendly nga waste disposal system ug daghan pang uban.

Kay una mapasunod ang mga tawo, kinahanglang makita una nila nga ang siyudad nagbuhat sab ani.