Diin masayop?

Daghan ang dili pa makatuo hangtod ron sa resulta sa eleksiyon dinhi sa Sugbo. Kini human gipildi sa way kasinatian sa politika ug way makenarya nga si governor-elect Pamela Baricuatro ang tang-an ug beterana sa politika nga si outgoing Governor Gwen Garcia.

Maisip si Garcia nga higante sa politika tungod kay anaa niya ang tanang gikinahanglan aron modaog sa eleksiyon---kwarta ug organisasyon. Gawas sa dakbayan sa Danao, kaalyado niya ang tanang mga mayor sa kalungsoran ug mga component cities. Gani dunay mga lungsod ug syudad nga iyang mga kaalyado ang nag-atbang.

Ang iyang kaatbang way bisan usa ka mayor ug kapitan nga kaalyado, busa wa gyuy nagdahom sa nahimong resulta sa eleksiyon. Human maihap ang tanang election return, si Baricuatro mihipos og kinatibuk-ang 1,107,924 ka boto, samtang si Garcia duna lay 765,051.

Gawas sa mga lungsod sa isla sa Bantayan ug Camotes, gidominar ni Baricuatro ang hapit tanang mga lungsod ug component cities. Unsa man kahay hinungdan nganong taliwa sa suporta sa mga mayor ug mga kapitan, wala man mosaler ang makinarya ni Garcia? Gitraydor kaha siya sa mga mayor ug sa iyang mga kaalyado?

Diin man masayop si Garcia nganong taliwa sa tanan niyang nabuhat nga kaayohan sa probinsiya gibaliwa man sa kadaghanan? Dili malalis ang kadako sa iyang natampo sa estado sa lalawigan sa Sugbo—numero uno ug labing dato sa tibuok nasud.

Siya maoy bugtong gobernador nga nakapasemento sa kadalanan sa kabukiran ingon man naghatag og supply sa tubig.

Apan taliwa sa iyang mga maayong tinguha sa probinsiya, dunay gagmay’ng mga butang siyang nataligam-an ug maoy nahimong hinagiban sa iyang kaatbang aron motuhop sa huna-huna ug kasing-kasing sa publiko nga siya nagkuwang ngadto nila.

Duha ka isyu ang gigamit ni Baricuatro batok ni Garcia apan labihan ka importante tungod kay mas maka-relate ang mga kabus---ang giingong kakuwangan sa supply sa mga tambalanan ug ang negosyo sa mga pansayan diha sa mga terminal.

Nasayop sab si Garcia dihang iyang gipunit ang mga pagpangatake ni Baricuatro niya diha sa social media tungod kay sa iyang gihimo iyang gipukaw ang pagkakoryoso sa publiko ug gipaila-ila na hinuon ang iyang kaatbang nga wala gyud unta mailhi. Wala sab makatabang nga ilang nahimong kritiko ang inilang magsisibya sa Sugbo nga gipaminaw sa kabukiran ug ang mga negosyante nga nasilo sa iyang mga polisiya.