Gilimbongan ang napildi

Gipaneguro ni COMELEC Chairman George Garcia ngadto sa publiko nga walay pagmanipula sa mga boto o system glitch nga nahitabo sa nakalabay’ng eleksyon bisan sa kalangan usahay sa pag-padangat sa unofficial count ngadto sa Parish Pastoral Council for Responsible Voting (PPCRV).  Gipasabot usab ni Garcia nga posible’ng adunay mga technical issues sa data processing sa PPCRV.  Bisan ni’ng pagpasabot ni Garcia, dili malikayan nga aduna gihapo'y mga pagduda ang katawhan.  Matud pa’s akong amigo, “Kon modaug ang kandidato, matinud-anon ang pamaagi sa eleksyon apan kon pildero, adunay limbong nga gibuhat ang COMELEC."  Fezteleern!

Pasayloa ko sa imong sala

Ubay-ubay nga mga botante ang mipadayag sa ilang reklamo ngadto sa social media tungod sa giingon’g wala pagtakdo sa mga ngalan sa ilang gibotohan’g kandidato ngadto sa voter’s receipt.  Apan segun usab sa COMELEC, walay ebidensya kining reklamo sa mga botante hinonoa, dako ang posibilidad nga nalimot lang ang botante kon kinsa ang ilang gibotohan.  Sinalbahes man kining pangatarungan sa COMELEC kay gipakasala man dayon ang botante sa iya mismo’ng reklamo.  Kon mao man lang gani, igo na lang diay kita moingon sa COMELEC nga, “Nyor, pasayloa intawon ko sa imong sala.”  Madahaan!

Mobotar pud ang ACM

Namahayag usab si COMELEC Chairman George Garcia nga ang naghinobrang kainit sa panahon ingon man ang nag-kadaghan nga mga botante mahimo’ng naka-apekto sa sa mga automated counting machines (ACMs) hinungdan nga giluwa niini ang ubang balota.  Adunay andam nga tubag kanunay ang COMELEC sa matag reklamo nga ipadangat kabahin sa pagpahigayon sa eleksyon.  Makaingon man lang ‘sab kita nga, “Dili lang diay katawhan ang mopili og kandidato, lakip na usab diay ang mga ACMs kay magbuot ra man kini kon kinsang balota ang iphon.”  Ateerr!

Walay gi-interview

Gumikan sa wala damha nga resulta sa 2025 Philippine elections, diin misukwahi kini sa mga survey nga gihimo, namahayag ang mga pangulo sa mga public opinion pollsters sama sa OCTA Research Group ug Social Weather Stations (SWS) nga dili mga ‘crystal ball’ ang survey ug nga mahimo kining mausab.  Sayon da kaayo sa mga opinion pollsters ang paghatag og rason kon ngano wala matinuod ang ilang survey.  Matud pa sa akong amigo, “Wala man jud ko motoo ana’ng survey kay wa pa jud ko kadungog nga naa ko’y kaila, silingan o paryente nga gi-interview ani nila.” Pagkatoytoy!

Mas maanindot ang kwarta

Gidayeg ug gipasalamatan sa DepEd ang mga magtutudlo ug uban pa’ng mga poll workers tungod sa ilang commitment nga gipakita sa pagpahigayon sa Election 2023.  Dili tinuod maisip ang kahago ug tampo sa mga magtutudlo matag eleksyon ug ang pagtuman nila sa ilang katungdanan maoy labing mahinungdanon’g aspeto sa kalampusan sa eleksyon.  Kon buot hunahunaon, mariyot ra kaayo ang ilang madawat nga honorarium kon itandi sa ilang gimbuhaton.  Kay matud pa bitaw sa ubang magtutudlo, “Maanindot ang mga pagdayeg apan mas maanindot kon aduna pa gayo’y dugang kwarta.”  Muleeng!