Budhi sa sample ballots
Dunay mga mayor sa Sugbo nga nipasalig ni Presidente Ferdinand Marcos Jr. sa hingpit nga suporta sa iyang senatorial candidates. Pero ilang sample ballots nga gi-apud-apod dayong eleksiyon, nga nagrepresentar sa gamhanang makinarya sa politika sa administrasyon kay gikatahong gitaptan og “pahalipay,” nibisto nga namangka sila sa duha ka suba.
Giapil nilang labing suod nga mga alyado ni kanhi Presidente Rodrigo Duterte. Ambot tungod ba sa personal nga relasyon, utangan og kabubut-on, gibundakan og dakong kuwarta, o may gipangluoran sa Malakanyang.
* * *
Si Lapu-Lapu City Mayor Ahong Chan giingon nga nilista sa iyang sample ballot nilang Bong Go, Bato dela Rosa ug Rodante Marcoleta. Wala maapil sa sample ballot ni Chan ang senatorial candidates sa administrasyon nga silang Abby Binay, Tito Sotto ug Panfilo Lacson.
Gisungog si Chan sa pagpangandam nang daan kay segurong mahibalik si Sotto pagka Senate President. Ug mahimong si Lacson maoy mobanhaw sa imbestigasyon sa gidudahang koneksiyon ni Chan sa ilegal nga POGO.
* * *
Ubang mga mayor nga gipasanginlang nagbudhi pinaagi sa ilang sample ballots:
Consolacion Mayor Nene Alegado nga giingong niapil nilang Bam Aquino ug Imee Marcos ug ni-junk ni Lito Lapid;
Talisay City Mayor Samsam Gullas nga giingong nidala nilang Aquino, Go ug Marcos ug ni-junk nilang Lacson ug Sotto; ug
Dumanjug Mayor Gun-Gun Gica nga giingong nidala nilang Aquino, Marcos ug Ben Tulfo ug ni-junk nilang Lacson, Pia Cayetano, Lito Lapid ug Francis Tolentino.
* * *
Dili hinuon monopoliya sa mga alyado sa administrasyon ang paglikoy. Sample ballots ni kanhi Cebu City Mayor Mike Rama, nga maoy opisyal nga kandidato ni Duterte ug nipasalig nga mangulo sa pagpalig-on sa partido sa tibuok Sugbo ug Kabisay-an isip bise presidente sa Partido Demokratiko Pilipino (PDP), giingong naglakip sa administration candidates nga silang Cayetano ug Bong Revilla.
Bisan ang sample ballot sa Bando Osmeña Pundok Kauswagan (BOPK), nga dili alyado sa administrasyong Marcos ug labaw nang dili higala kay nabiktima sa panghasi sa dinastiyang Duterte, nakapakugang sa ilang mga dumadapig. Kay naglakip sa ngalan ni Marcoleta. Kinsa giingong nipasalig, ug ambot nganong gituohan nila, nga ang grupo nilang Nestor Archival ug Tommy Osmeña maoy suportahan sa Iglesia ni Cristo (INC).
* * *
- Latest
