Piniliay karong tuiga

Makalilisang ang nahitabo nga dunay nabalita nga piinusilay mismo sulod sa mga tunghaan diin gihimo ang pagbotar sa katawhan. Kining maong kahimtanga magdala kanato sa pagpangutana: “Ingon na ba gyud niini kadautan sa atong nasud? Ingon man sa mga lumulupyo niini?

Aduna pay nabaniog nga lahi ang nigawas sa resibo kaysa imong gibotaran. Adunay edaran nga giatake tungod sa kainit ug namatay panahon mismo sa iyang pagbotar.

Ang mga nahiunang mga panghitabo bunga sa sistema nga dunot nga sa hinayhinay atong gihangop.

Ang uwahing insidente bisan pa man kun bunga sa natural nga hinungdan apan gumikan usab sa pamaagi tingali kun unsaon paggiya sa mga edaran ang atong mapangutana usab. Tinuod daghan kita og ikasaway.

Daghan kita og ikasulti apan wala ba nato mapangutana ang atong kaugalingon ning mosunod nga mga pangutana:

· Nahimo ba akong panatiko?

· Gilabanan ko ba ang nasud o ang politiko?

· Ang pagdawat sa kwarta agig bugti sa atong boto gihimo ba nato?

Ang mga panghitabo sa atong palibot ang nisalamin lamang sa atong pagkatawo ug sa atong prinsipyo. Ang atong prinsipyo nga usahay atong ibaylo sa bisan unsang lumalabay lamang. Tingali tungod sa atong dakong panginahanglan ug hinanaling tubag sa atong panginahanglan.

Apan ang tanan dunay bugti. Dili mahitabo nga ang kapital nga gibuhian mahimong pasagdan lamang. Gikalipay nato ang manggatos nga hinatag apan sa kaulahian makamatngon na lamang kita nga wala gyud matarong ang mga serbisyo alang sa kaayohan sa kinabag-an.

Mao nga dili mahunong ang liyok sa korupsiyon kay nahimo kitang kabahin niini. Hangtud kanus-a kini mahunong? Ug hangtud kanus-a man kita makaamgo ug magkat-on? Paigo lang ba ang pag-ampo? Ug kita nga nasayud sa matuod unsa man ang atong gihimo?