Congrats sa mga winners

Pagsuwat ko niining maong lindog kagahapon, nagpadayon pa ang mga tawo pagbotar ug wa pa masayri kon kinsa sa mga kandidato ang midaog.

Dinhi sa Cebu, tulo ang nagpapili pagka gobernador, apan duha ra gyud ang gihulagway nga maoy magsangka kinsa kanila ang modaog. Sila ra si reelectionist Governor Gwen Garcia ug si Pamela Baricuatro.

Sa Cebu City, lima ang nagpapili pagka mayor, apan upat ra ang angay’ng tutokan kon kinsa kanila ang modaog. Sila mao si Mayor Raymond Garcia, kanhi Mayor Michael Rama, Konsehal Nestor Archival ug Yogi Felimon Ruiz.

Kining upat ka mga kandidato pagka mayor sa Cebu City, pulos nako kini mga amigo, mao nga kon kinsa man kanila ang midaog, awhagon nako nga moserbisyo gyud unta sila alang sa kaayohan sa kinabag-ang katawhan.

Unya, kabahin sa isyu pagpanghatag og kwarta ug mga bugas ngadto sa mga botante, nga gipaagi sa mga lider sa politiko, ayaw na lang ni ninyo hisguti uy, gawas kon wa sab mo maghimo niini.

Ang nakanindot dinhi sa Cebu City, kay wa ka makadungog nga dunay mga kandidato nga midaot sa ilang mga kaatbang. Tungod tingali kini kay manag-amigo ra man sab sila.

Kon duna may mipasaka og kaso batok sa usa ka kandidato, ang mihimo niini ang dumadapig ra sa kandidato. Sa ato pa, nagpabilin pa kanila ang respito sa usa’g-usa.

Abi ninyo, nakadungog gani ko nga dunay usa niining mga kandidato pagka mayor sa Cebu City nga atong gihisgotan, kon siya ang modaog, ang iyang mga kaatbang nga pilderong kandidato kuhaon niya’g consultant iniglapas na sa usa ka tuig.

Nakaingon ko nga nindot kaayo ang plano sa maong kandidato, kay kini nagpaila nga wa niya ilha nga kaaway ang iyang mga kaatbang, kondili, pareho ra sila nga aplikante sa pagpangalagad sa katawhan.

Ang laing gitutokan karon sa katawhan, kon kinsa ang nag-una sa mga kandidato pagka senador. Posible tingali duna pay ubang mga certificate of canvass gikan sa lagyong mga lugar nga wa pa makwenta.

Gitutokan karon sa katawhan kon pila ka mga senador nga alyado sa mga Duterte ang makalusot, kay mao kini ang basehan kon mataktak ba gyud si Vice President Sara Duterte nga nag-atubang karon og impeachment trial sa Senado.

Ang mga senador maoy magsilbing huwes ug mohukom kon taktakon pa, o dili, si Sara. Kon dunay bisan siyam lang ka senador nga alyado sa mga Duterte, dili na mataktak si Sara kay nagkinahanglan man og labing menos 16 ka senador nga mobotar pabor sa pagtaktak kang Sara.