Pagboto nga dunay responsibilidad

Karon adlawa, milyones gikan sa Batanes hangtud sa Tawi-Tawi ang magmartsa ngadto sa mga polling precincts aron pagbotar sa bugnong lugaynon. Gumikan niini, aduna kitay dakong katungdanan sa pagpili sa mga magbabalaod ug mga lokal nga lider sa komunidad.

Ang pagboto dili lang usa ka katungod kanato nga mga molupyo sa usa ka demokratikong nasud. Usa kini ka responsibilidad nga nagkinahanglan og maayong pagpangandam ug husto nga pagpili. Apan unsaon pagboto nga adunay responsibilidad?

Nag-una niini ang paglili sa mga kandidato. Ug dili usab kita magpadala sa mga kampanya nga puno sa saad. Angay susihon ang ilang plataporma ug track record, ug paminawon ang ilang mga baruganan sa mga isyu nga may kalabotan ang lungsod.

Kinahanglan usab nga atong bantayan ang mga pamaagi sa vote-buying ug pagpanglimbong. Mao nang ang atong mga boto dili angay ibaligya tungod kay ang labing importante mao ang pagpili sa lider nga adunay integridad kay sa temporaryo nga benepisyo.

Tungod kay karon na ang adlaw sa paghukom, atong sigurohon nga nahibalo kita sa atong presinto ug magdala og mga kinahanglanon sama sa valid ID. Mobotar kita og sayo aron malikayan ang taas nga linya ug kalibog.

Angay gayud sundon ang hustong proseso sa pagboto sama sa pag-shade sa lingin tupad sa ngalan sa napili nga kandidato gamit ang gihatag nga pentel pen. Siguradohon nga ipasa ang balota sa automated counting machine (ACM) ug tan-awon ang voter receipt aron masiguro nga sakto ang proseso.

Labing importante ang pagbantay sa kalinaw gumikan kay ang eleksiyon usa ka sagrado nga proseso. Mao nang angay usab ipakita nato ang respeto ngadto sa ubang botante aron paglikay sa kasamok.

Ang atong boto mao ang atong tingog, ug gahum paghulma sa kaugmaon sa atong nasud. Busa, botohi ang adunay kapasidad, integridad, ug tinuod nga kasingkasing sa pagserbisyo sa katawhan.