Pagsulay sa balaod ug pulitika

Ang Ombudsman mimando og unom ka bulan nga preventive suspension kang Gobernador Gwendolyn Garcia tungod sa kontrobersyal nga special permit nga iyang gihatag sa usa ka kompanya alang sa desilting sa Mananga River. Ang maong desisyon nagbunga og daghang pangutana ug reaksiyon.

Sumala sa Ombudsman, ang suspensiyon gikinahanglan aron masusi ang legalidad sa maong permit nga giingong walay Environmental Compliance Certificate (ECC) gikan sa Department of Environment and Natural Resources (DENR).

Ang gobernador, sa laing bahin, mipahayag nga ang iyang aksiyon usa ka tubag sa krisis sa tubig nga nakaapekto sa daghang lugar sa Sugbo.

Sa iyang pagpabilin sa puwesto, si Garcia miingon nga wala siyay legal nga obligasyon sa pagsunod sa maong mando tungod kay kini gipagawas sulod sa election period.

Matud niya supak sa balaod ang suspensiyon sa mga lokal nga opisyal tungod kay gidili kini sa Commission on Elections (Comelec).

Kini nga baruganan nagdala og mas lawom nga diskusyon kabahin sa gahum sa Ombudsman ug sa proteksiyon sa mga napiling opisyal panahon sa eleksiyon.

Ang Malacañang mipahayag nga dili kini manggilabot sa maong isyu, ug si Presidente Ferdinand Marcos Jr. mipasabot nga ang balaod angay lamang sundon ug ang gobernador angay hatagan og patas nga pagratar samtang nagpadayon ang legal nga proseso.

Sa laing bahin, ang igsuon ni Garcia, si Rep. Pablo John Garcia, mihatag og "unsolicited advice" nga mas maayong mosunod ang gobernador sa mando sa Ombudsman samtang nagpaabot kini sa legal nga kasulbaran sa maong isyu.

Kini nga panghitabo usa ka pagsulay sa atong sistema sa balaod ug sa gahum sa mga institusyon nga nagbantay sa gobiyerno.

Ang pangutana karon mao kini: Ang suspensiyon usa ba ka lehitimong lakang sa pagpatuman sa balaod, o usa ba ka pamolitika?