EDITORYAL — Nagyawit ang di tigpalit

Makalibog gyud ang mga Pilipino, karon nga naa na hinuoy tag P20 kada kilong bugas nga pwedeng mapalit sa mga kabus nga pamilya, nakakita lang gihapon og ikasaway unya dunay mga pagduda kun molahutay ba kini hangtud sa hangtud.

Tingali dunay mga basihanan ang ilang pasangil nga gipang-agup-op, lagum ug baho na ang mga bugas kay kuno gikan sa National Food Authority.

Kay dunay mga nanggawas nga mga pictures diha sa social media sa mga sinakong bugas nga dunay tatak nga "NFA" nga lagum gyud tinuod ug gipang-bukbok na.

Apan wala pud ba kahay motibo ang mga nag-post ani? Wala ba kaha sila suholi lang aron dauton na sab kining P20/kg nga bugas? Tinuod ba kaha sa NFA gyud kadto?

Dili gyud hinuon pwedeng tandion ang well-milled rice gikan  sa NFA rice sa well-milled commercial rice. Kay kining sa NFA rice gipaningkamotan baya sa gobiyerno nga luwas gihapon ug makaon gihapon sa tawo ang bugas gikan sa ilang mga bodega.

Dili kini sama sa commercial rice nga daghang prosesong giagian aron mosinaw, puti, humot ug uban pang kalidad nga wala sa NFA rice. Mao bitaw nga mas mahal ang commercial rice. Kung buot hunahunaon ang P100 sa mga pobreng pamilya kun NFA rice, lima ka kilo na. Pila ka adlaw na kining konsumo. Kun commercial rice pa na, dili na kaabot duha ka kilo. Asa man makadaginot?

Usa pa, dako kini og matabang sa local farmers kay ang ilang abot man maoy paliton sa gobiyerno para ibaligya og tag P20/kg inabagan sa subsidiya sa mga LGUs.

Kanang nagsige og yawit diha sa social media batok aning tag P20/kg nga bugas, giinsulto nila ang mga kabus nga maoy tigpalitan niini.

Kanang sige og panaway maka-afford man na og commercial rice kay makapalit gani sila og load pang Facebook ug Tiktok, dili ba? Usa pa, mokaon ba diay na sila og tag P20/kg nga bugas?