Lipatlipat

Gipahibawo sa administrasyong Marcos nga mapalit na sugod sa Mayo 1 ning tuiga ang tag P20 kilo nga bugas dinhi sa Sugbo ug sa kinatibok-ang Visayas area. Gipahibawo kini atol sa pagbisita ni Presidente Bongbong Marcos dinhi sa dakbayan sa Sugbo niadtong miaging semana.

Gibutang usab sa Facebook page sa Presidente ang mapalit nga 20 pesos nga bugas nga anaa ang iyang hulagway nga nagkugos og sako sa bugas nga jasmin.

Apan sa atong nahibawan gikan ni Department of Agriculture Secretary Francisco Tiu Laurel nga NFA rice ang ibaligya nga tag 20 pesos nga kilo sa bugas. Kadto kining bugas nga hapit na mangadaut.

Gipasigarbo ni Gobernador Gwendolyn Garcia ug miingon nga nahatagan na gyod og katumaman ang saad sa Presidente.

Abi ko ba og tanang klase sa bugas ang mapalit nato sa tag 20 pesos. Dili man diay kay NFA rice raman diay ang mapalit nga tag 20 pesos. Dili pud tanan ang makapalit sa tag 20 pesos nga bugas tungod kay ang mga senior citizen lang, sakop sa 4Ps,  solo parent ug PWDs ang makapalit niini sa quota nga tag 40 kilos lamang matag upat ka semana.

Gipasabot ni Secretary Laurel nga giuna ang Visayas area tungod kay labi kini nga nanginahanglan.

Ang mapalit nga tag P20 kilo nga bugas usa kini ka matang sa vote buying. Dili kini pagtuman sa saad kun dili pagpamalit og boto.

Dili ang taga Visayas ang labing nanginahanglan sa bugas kun dili ang mga kandidato sa administrasyong Marcos ang labing nanginahanglan sa boto sa Visayas area.

Lipat-lipat ang gihimo sa administrasyong Marcos. Sa Facebook page sa presidente imong makita nga nagkugos siya og jasmin rice nga may kapsiyon nga tag 20 kilo pero dili kini nga bugas ang imong mapalit tungod kay ipamaligya NFA rice.

Ayaw na mo palipat kay humana ra ba mo malipat niadtong miaging 2022 nga piniliay. Lisod na kun makaduhaan pa mo pagkalipat.