Kinsa’y nag-una sa mga survey?

Katuohan ba ang mga gipagawas nga popularity survey sa mga political groups nga nagpakita nga ang ilang mga kandidato maoy nag-una ug lupig ang mga kandidato sa kaatbang nilang grupo?

Kon ako’y inyong pangutan-on, makaingon ko nga mahimong dili “accurate” ang gipagawas nga survey results, apan mahimo kini nga basehanan sa mga lider sa lainlaing political groups.

Ang pangutana kon giayo ba nila sa pag-survey, ug gihimo ba nila ang survey sa lainlaing lugar? Basin og ang napangutana sa survey kadto ra ba nga mga dumadapig sa kandidato nga ilang gipaboran, ug wa ang uban.

Ikaduha, kinsa man ang naghimo sa survey? Duna kaha’y grupo nga mohimo ra gyud og survey nga wa sila bayari? Kon ayuhon paghimo ang survey, dili kini sayon ug kinahanglan ka nga mogasto’g kwarta.

Kon ang usa ka politikanhong grupo mohimo og ilang independent survey, unya sa resulta malupig ang ilang kandidato, makaako kaha sila nga itug-an gyud ang matuod?

Para nako, ang usa sa timailhan nga ang usa ka kandidato pinangga sa mga botante, mao ang gidaghanon sa mga tawo nga manambong sa mga pulong-pulong/rally nga ilang ipahigayon.

Apan unsaon, ang sagad mahitabo nga kon dunay pulong-pulong nga ipahigayon, ang mga kandidato magdala man og daghang supporters nga gikan sa laing barangay ug makadugang kini sa gidaghanon sa mga tawo nga magtapok.

Duna ko’y politiko nga nahinabi, matud niya dili siya kaayo mosalig kon makakita og daghang mga tawo nga motambong og pulong-pulong nga maklaro niyang dili lumolupyo sa maong dapit.

Nahinumdom mo nga pipila ka tuig ang nakalabay daghang nanambong sa mga pulongpulong sa usa ka politikanhong grupo atol sa hinapos nga bahin sa kampanya, apan resulta pilde ang ilang mayor atol sa eleksyon?

Kay kadtong mga nanambong, hinakot gikan sa laing barangay. May nahinabi ko nga mga suod gikan sa lainlaing politikanhong grupo dinhi sa Cebu City, ug gihatagan ko nila sa resulta sa ilang mga survey.

Pulos sila nangangkon og mayoriya sa survey. Apan gitug-anan ko nila kon kinsa sa ilang mga konsehal ang “katagakon” sa ilang pagpangampanya, ug nakapanglingo-lingo ko kay dunay mga reelectionist nga apil sa mga imposible na nga makadaog pag-usab.

Duna sa’y mga bag-ong kandidato pagka konsehal sa Cebu City nga klaro nga dili na maapil sa posibleng makadaog, ug gani atol sa mga pulong-pulong nila, mug-ot na kaayo’g mga dagway.

Kon dili pa tingali lain tan-awon, basin dili na mokuyog sa kampanya kining mao nga mga kandidato. Pipila kanila miangkon na kanako nga lisud gyud sila nga makadaug.

Naa pay usa diha nga dagko kaayo og propaganda kay kwartahan man, apan matud pa apil kini sa mga maparot.