Mamahimong mo-demand ang co-owner nga bahinon ang property

Dear Atty. Divine,

 Ang among mga ginikanan adunay gibilin nga mga property. Upat mi ka mga igsuon ang magbahin niini. Ang among kamaguwangan dili gusto nga bahinon namo ang property ug ang iyang sugyot nga co-owners mi sa tanang property. Apan ang akong usa ka igsuon mas gusto sab nga bahinon ang property aron maka develop mi sa among share og mabuhat namo kun unsay among plano sa among bahin. Ang akong pangutana kun wa bay kalapasan sa balaod kun pananglit magsabot ming mga heirs nga dili nalang namo i-subdivide ang kabilin sa among mga ginikanan? Daghang salamat. —Lary

Dear Lary,

Kun adunay kasabotan ang tanang co-owners nga dili nila bahinon ang property mamahimo man kini apan sud sa napulo lang ka tuig aron kini mamahimong balido. Kining napulo ka tuig nga term mamahimo pa nga patas-an o lugwayan pinaagi sa laing kasabutan sa mga co-owner. Busa kamong mga co-owner mamahimo mong mopirma og kasabutan nga dili bahinon ang property sud sa napulo ka tuig ug kun mapupos na ang maong term, magpirmahanay na sab mo og laing kasabutan alang sa pag-extend niini. Apan kun moabot na or mapupos na ang term sa maong kasabutan, dili na gyud kamo makapugong sa ubang co-owners kun gusto na nilang kuhaon ang ilang share ug  mo-demand sila sa pag-subdivide sa property kay ila kanang katungod basi sa balaod. Ang Article 494 sa New Civil Code, kini nagkanayon: “No co-owner shall be obliged to remain in the co-ownership. Each co-owner may demand at any time the partition of the thing owned in common, insofar as his share is concerned.” Thank you and God Bless. —Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.