Pagpamalandong Matag Domingo Diosnong kalooy

Abril  27, 2025: Ikaduhang

Domingo sa Pasko sa Pagkabanhaw

(Pangilin sa Divine Mercy)

Mga Pagbasa: Buh. 5;12-16/Sal. 118/Gip.

1; 9-11a,12-13, 17-19/Jn. 20;19-31

Nahimong sentro matag Ikaduhang Domingo sa Pasko sa Pagkabanhaw mao man si Tomas ang giisip nga madudahon.

Matud pa niya nga anha ra siya motuo kun ang iyang mga tudlo mismo makahikap sa mga smad nga inagian sa mga lansang.

Ug tuod man human niya kini mahimo sa laing pagpakita sa Ginoo niingon siya: “Ginoo ko ug Dios ko!” ang maong pagtuwaw mao man ang atong pagaampoon ug ituwaw sa matag higayon nga kita mosud-ong sa hostiya ug sa kalis diha sa konsagrasyon.

Sa laing bahin ang matag ikaduhang dominggo sa pasko sa pagkabanhaw mao man ang pangilin sa Divine Mercy Sunday kun ang Domingo sa Diosnong Kalooy. Nagpahinumdom kini kanato nga ang Gugma ug kalooy sa Dios murag dagat ug ang atong mga sala murag tinulo.

Apan bisan pa man kun ingon ini ang kalooy ug kaayo sa Dios alang kanato apan dili kini excuse nga mag-abusar kita. Kay sa kaulahian kita pagahukman segun sa paagi nga kita mosanong sa gitanyag nga gugma sa Dios alang kanato.

Dili kita angayan nga magduha duha sa mga higayon daw mangitngit ang palibot gumikan sa mga suliran.

Ang Dios dili halayo, kondili nahimo siyang kabahin gyud nato ug nahimong usa nato. Wala siya sa kalibutan sa mga patay kondili buhi siya hangtud karon!

Kita mag-ampo: “Balaan nga Dios, Balaan nga Makagagahum, balaan nga walay kamatayon, kaloy-i kami ug ang tibuok kalibotan. (Balikon sa Makatulo)