EDITORYAL - Pahulay sa dayun Pope Francis

Ihatud karong adlawa sa kapahulayang dayon si Pope Francis didto sa Vatican. Siya ang Santo Papa nga dili sab basta makalimtan tungod sa kadaghang mga kausaban nga iyang gipatuman diha sa Simbahang Romano Katoliko ubos sa iyang pamunoan.

Kagahapong adlawa, liboang mga magtutuo ang milinya gyud sa Vatican aron bisan sa kataposang higayon makita nila ang lawas sa Santo Papa kinsa gibansagang Pope of Migrants tungod sa iyang mga pag-ampo alang niadtong nagtinguhang makalingkawas gikan sa paglutos ug kalisdanan sa ilang mga nasud.

Si Pope Francis usa ka Italyano, apan ang iyang mga ginikanan mi-migrate kaniadto sa Argentina diin siya natawo sa siyudad sa Buenos Aires. Siya gibunyagan sa pangalang Jorge Mario Bergoglio.

Ang Vatican mideklarar sab og siyam ka adlaw nga pagbangutan sugod karong adlawa human sa iyang paglubong.

Usa sa iyang mga pag-umangkong lalaki nga usa ka nurse lang ang makatambong gikan sa iyang nasud tungod sa ilang kakabus.

Usa ka babayeng negosyante maoy niabaga sa iyang pleti ug gastos sa biyahe padung sa Vatican kauban ang iyang pares human nakakita sa interbyu sa telebisyon didto sa ilang nasud nga dili siya makatambong sa haya kay wala siyay pamelete.

Ang nakalain ani, si Argentinian President Javier Milei naa na karon sa Vatican kauban ang unom ka opisyales sa iyang gobiyerno, apan walay kabanay sa Santo Papa nga giimbitar.

Sumala pa sa Vatican, gibanabanang 130 ka mga lider ug representante sa nagkadaiyang nasud ang motambong sa lubong sa Santo Papa ug usa na niini ang magtiayong sila si Presidente Ferdinand Marcos Jr. ug First Lady Liza Araneta Marcos.

Apil sa motambong si US President Donald Trump ug kapikas nga si Malania.

Ang Santo Papa namatay sa edad nga 88 anyos human sa pila ka bulang pakigbuno sa sakit nga pneumonia.