Nagkahiusa sa pagtibuwaag
Tungod sa pagkapriso ni kanhi Presidente Rodrigo Duterte sa The Hague, nagkauyon ang upat niya ka mga anak sa pagkuyog sa kampanya sa iyang senatorial candidates. Gusto ni Bise Presidente Sara Duterte nga isipon ang ilang kauyonan nga pasundayag sa panaghiusa. Pero kapasanginlan sab nga desperado ang ilang pamilya sa pagluwas sa himatyon na nilang dinastiya.
Kay ang pagdaog lang og dugang lingkoranan sa Senado ang makaluwas sa bise presidente sa nag-ung-ong niyang impeachment trial. Kay kon makonbikto dili nang kadagan ug mahagsa ang tanan nilang politikanhong ambisyon sa 2028.
* * *
Nasapawan hinuon ang bisan unsang ilusyon sa kalig-on sa dinastiya bisan pa kon ang ilang pangulo mahimong madugta sa prisohan sa dili malalis nga mga ebidensiya sa pagkatibuwaag:
Gisuportahan ni Bise Presidente Duterte silang Imee Marcos ug Camille Villar puno sa DuterTEN (ang 10 ka senatoriables sa iyang amahan); samtang
Gisuportahan ni Kongresista Paulo Duterte silang Gringo Honasan ug Ariel Querubin nga maoy Plus 2 sa DuterTEN; pero
Niinsistir ang DuterTEN nga 10 ra sila ug modawat lang og dugang kon ang sugo gikan mismo sa kanhi presidente.
* * *
Pero walay bisan usa sa DuterTEN nga maka-istorya sa kanhi presidente kay ang tugotan sa International Criminal Court (ICC) mao rang iyang mga abogado ug mga sakop sa pamilya:
Bisan ang presidente sa Partido Demokratiko Pilipino (PDP) nga si Robin Padilla napugos pagkumpisal nga ang iyang suporta ni Imee walay pagtugot sa kanhi presidente ug dili makabugkos sa partido; ug
Bisan si Bise Presidente Duterte niangkon nga ang iyang suporta nilang Imee ug Camille walay pagtugot gikan sa iyang amahan.
* * *
Si Kongresista Duterte nga tua karon sa The Hague mao ray nangangkon nga giuyonan sa kanhi presidente ang iyang suporta nilang Honasan ug Querubin. Ambot kon unsay mensahe nga makuha ni Bise Presidente Duterte sa sunod nilang istorya sa telepono sa iyang amahan.
Bisan sa wala pa mapriso, wala nay klaro si kanhi Presidente Duterte sa iyang gisuportahang senatoriables. Sa eleksiyon sa 2022, giawhag niyang mga botante sa pagpili og 17 sa 12 ra ka bakanteng lingkoranan. Sa kaabunda sa iyang endorsements, wala pa gyod maapil ang usa sa opisyal nga mga kandidato pagka senador sa PDP.
* * *
- Latest
