Balik sa Galilea

Basaha:  Mt. 28; 8-15

Pag-Ampo

O Dios ko, masaligon sa imong walay sukod nga gahom ug sa imong kalooy nga walay sukod ug sa imong mga saad, malaumon ako nga mabatonan ko gikan kanimo ang kapasayloan sa akong mga sala ug ang grasya sa kinabuhing walay katapusan pinaagi sa mga merito nga iya ni Ginoong Jesukristo, akong Ginoo ug manluluwas. Amen.

Ang bili sa Galilea

1. Ang Galilea mao ang dapit diin ang atong Ginoo nihimo sa iyang mga kalihukan sama sa pagpanudlo, paghimo og mga Milagro ug uban pa.

Gani, sa maong dapit usab gitawag niya ang iyang mga tinun-an, kadtong mga tawo nga nikuyog ug nitabang kaniya sa mga gimbuhaton.

2. Ang Galilea mao ang kahigayonan ug luna sa pagsugod sa ilang tumong ug misyon nga mao ang pagsangyaw sa paghari sa Dios.

3. Ang nahitabong kamatayon sa ilang mga magtutudlo nga si Jesus nakahatag og dakong kasagmuyo sa iyang mga sumusunod.

Kasagmuyo nga nakapangitngit sa ilang panlantaw alang sa umaabot, nga alang kanila walay kasegurohan human “pakyas” ang ilang magtutudlo.

Balik sa Galilea

1. Gikatagbo ni Jesus ang mga babaye ug iya silang gidasig: “Ayaw kahadlok!” ug iya silang gimandoan: “Ingna ang akong mga igsuon nga mag-una ako nila didto sa Galilea!”

2. Ang kamatayon dili babag aron padayonon paggambalay ang bisan unsang misyon nga nasugdan.

3.  Balik sa Sukaranan ug sinugdanan aron ikaw makapanaw padulong sa imong pagadulngan.

Ang Galilea sa atong kinabuhi

1. Ang atong hunahuna naputos sa kangitngitan gumikan sa mga kalibog.

2.  Ang atong mga galamhan ingon man ang atong kasingkasing napuno sa kapakyas ug pagbangotan.

3.  Hinumdomi nga ang tanang mga butang lumalabay lamang lakip na niini ang atong mga suliran.

4. Balik lantaw sa mga kasinatian nga naghatag kanimo og kadasig ug kalipay. Ug diha sa imong hunahuna puy-I sila pag-usab.

5.  Pag-ampo dili aron masulbad lamang ang suliran kondili pag-ampo nga mamahimo kang mohamtong ug molig-on human sa maong kasinatian ug suliran.

6. Sud-onga ang imong magtutudlo nga si Jesus diha sa krus ug hinumdomi mas dako pa siya kaysa bisan unsang unos!

7. Sa dihang gipanamkon ka pa lang adunay gitagana nga misyon alang kanimo. Dili sulagma nga ikaw nahimugso busa ayaw tugoti ang kawalay paglaum nga mopalong sa imong mga gitinguha.

Hinumdomi: Malangay man tuod ang panaw padulong sa atong kabanhawan ug pagdaug gikan sa mga kalisud ug kapakyasan, apan isulod sa alimpatakan nga ang Roma wala matukod sulod sa usa lamang ka adlaw!