EDITORYAL — Pope Francis

Nagbangutan ang kapin usa ka bilyong mga magtutuo sa Simbahang Romano Katoliko sa tibuok kalibotan sa pagtaliwan ni Santo Papa Francis kagahapon sa buntag, Lunes, Abril 21, 2025 didto sa Vatican.

Si Pope Francis, nitaliwan sa edad nga 88 maoy labing unang Argentinian nga nahimong Santo Papa. Nipuli siya ni Pope Benedict XVI niadtong Pebrero 28, 2013 human ni-resign ang naulahi gumikan sa kahuyang na sa panglawas niini.

Daan nang nagmasakiton ang Santo Papa tungod sa kahuyang na sa iyang baga. Sa bata pa kini, naoperahan na siya sa baga.

Sa kasaysayan sa Pilipinas, si Pope Francis sab ang ikatulong Santo Papa nga nakabisita dinhi sunod nilang Pope Paul VI niadtong 1970 nga mao sab ang pinakaunang papal visit sa tibuok Southeast Asia; Pope John Paul II nga makaduha ka higayon nibisita niadtong 1981 ug 1995.

Tuig 2015 sa dihang si Pope Francis nibisita dinhi sa Pilipinas, magduha palang siya ka tuig gikan natudlong lider sa pinakadakong simbahan sa tibuok kalibotan.

Pipila palang ka bulan gikan natudlong Santo Papa si Pope Francis tuig 2013, naigo ang Pilipinas Super Typhoon Yolanda mao nga pagka-2015 niduaw siya sa mga biktima ilabi na didto sa Leyte nga maoy unang gikusokuso sa maong katalagman.

Sa tanang mga Santo Papa, si Pope Francis maoy talagsaon og mga polisiyang gipatuman para sa Simbahan apil na para sa kaparian ug mga Obispo, sagol pagka liberal ug konserbatibo.

Buot niyang dunay modernisasyon sa simbahan apan dili mopalayo sa mga tradisyon. Butang nga gisaway sab sa pipila ka konserbatibo sama sa iyang pagdawat sa mga LGBTQ community, pagpasaylo sa nag diborsyo ug kadtong nalambigit og aborsyon, pakig-dayalogo sa ubang relihiyon ug uban pa.